Almaty oblysy ákimdiginiń ǵımaratyn tonaǵan kúdiktiler ustaldy

TALDYQORǴAN.QazAqpatat - Taldyqorǵandyq polıtseıler jappaı tártipsizdikter kezinde Almaty oblysy ákimdiginiń ǵımaratyn tonaǵan kúdiktilerdi ustady, dep habarlaıdy QazAqparat tilshisi.

Óńir ákimdiginiń Taldyqorǵanda ornalasqan ǵımaratyn qıratyp, órtep jatqan kezde 24 jáne 28 jastaǵy qala turǵyndary keńse tehnıkasyn, turmystyq zattardy qoldy qylǵan. Kúdiktiler tipti qalam-qaryndash syndy usaq keńse taýarlary men býma-býma ájethana qaǵazyn áketkenin moıyndady.

Qazir olardyń kinási aıǵaqzattarmen dáleldenip, ýaqytsha ustaý ızolıatoryna qamaldy. Qylmystyq kodekstiń 188-baby boıynsh sotqa deıingi tergeý bastaldy.

«Munyń barlyǵy ákimdiktiń zattary», - dedi kúdikti polıtsııa usynǵan vıdeoda.

Sondaı-aq Almaty oblysyndaǵy jedel operatsııalar barysynda 133 adamǵa ustalyp, 188 qylmystyq is qozǵaldy. 300-ge jýyq azamat ákimshilik jaýapkershilikke tartyldy. Qoldy bolǵan 181 qarý qaıtaryldy. Onyń 110 danasy «Makarov» tapanshasy. Qarý-jaraqty ózderi ákelip ótkizip jatqandar da bar.