Almaty oblystyq soty Qaırat Mámıge bir jyldyq jumystaryn baıandady
Іs-sharaǵa Joǵarǵy sot tóraǵasy Qaırat Mámı, Almaty oblysynyń ákimi Amandyq Batalov, Almaty oblysy sotynyń tóraǵasy Meırambek Taımerdenov qatysty, dep habarlaıdy QazAqparat.
Almaty oblystyq sotynyń baspasóz qyzmetinen málim etkendeı, Meırambek Taımerdenov aımaq sottarynyń 2016 jyly sot tóreligin júzege asyrýynyń jáne isterdi qaraýdaǵy zańdylyqty saqtaýynyń negizgi qorytyndylarymen tanystyrdy. Budan ári Sýdıalar odaǵynyń Almaty oblystyq fılıalynyń Sýdıalar ádebi komıssııasynyń tóraǵasy B.Zaǵıev sóz sóılep, óńir sýdıalarynyń áreketterine qatysty ótinishter men shaǵymdardy qaraýdyń nátıjesin habarlady. Budan keıin birqatar sot tóraǵalary jumys qorytyndysy boıynsha baıandama jasady.
Keńes qorytyndysyn shyǵara kele, Joǵarǵy sot tóraǵasy Q.Mámı Memleket basshysynyń qatysýymen ótken Sýdıalardyń VII sezinde «100 naqty qadam» Ult josparyn praktıkalyq turǵydan iske asyrýdyń negizgi nátıjelerin aıtyp ótti.
Jalpy alǵanda, úsh satyly sot tóreligi júıesi sátti iske qosyldy, sýdıalardy irikteý men ilgeriletý júıesi aıtarlyqtaı qatańdatyldy, Sot jıýrıiniń jumysy reformalandy, Joǵarǵy sot janynan ınvestıtsııalyq daýlardy qaraıtyn mamandandyrylǵan alqa, Sot tóreligi akademııasy men Halyqaralyq keńes quryldy. Tergeý sýdıalarynyń, alqabıler sotynyń quzyreti neǵurlym keńeıtildi, azamattyq ister boıynsha prokýrorlardyń sotqa qatysýy qysqartyldy. Sýdıalardyń jumystaǵy jáne qyzmetten tys ýaqyttaǵy júrip-turýyn naqty reglamentteıtin jańa Sýdıalyq ádep kodeksi qoldanysqa engizildi. Jańa aqparattyq tehnologııalardyń, sonyń ishinde barlyq sot zaldaryn aýdıobeınetirkeý júıelerimen tolyqtaı jaraqtandyrý nátıjesinde sottardyń qyzmeti neǵurlym ashyq ári aıqyn bola tústi.
Jańa Azamattyq protsestik kodeks pen qylmystyq zańnama joǵary tıimdiligin kórsetýde. Muny statıstıkalyq kórsetkishter aıqyn dáleldep otyr.
Respýblıka boıynsha barlyq azamattyq isterdiń 59,2% jeńildetilgen is júrgizý tártibimen qaraldy. Medıatsııany qoldana otyryp aıaqtalǵan isterdiń sany úsh ese artty, daýdy sheshýdiń balamaly tásilderi shamamen eki ese jıi qoldanyldy. Prokýrorlardyń qatysýymen qaralǵan isterdiń sany shamamen tórt esege azaıdy.
Respýblıka boıynsha sotqa deıingi jedeldetilgen tergeý tártibimen qaralǵan qylmystyq isterdiń sany 14%-ǵa, kelisimdik is júrgizý tártibimen aıaqtalǵan ister - 10%-ǵa, qysqartylǵan tártippen qaralǵan ister - 2 eseden kóp mólsherge artty. Aqtaý úkimderiniń sany 19,2%-ǵa, alqabılerdiń qatysýymen qaralǵan qylmystyq ister - 11,9%-ǵa kóbeıdi.
«Sýdıalardyń VII sezinde Memleket basshysy aıqyndaǵan sot qyzmetiniń basymdyqtary adamnyń quqyqtaryn, bıznes pen memlekettiń zańdy múddelerin quqyqtyq qorǵaýdaǵy sottardyń rólin arttyrýǵa baǵyttalǵan. Kez kelgen reformanyń eń basty maqsaty zań ústemdigin, quqyqqa qaıshy áreketter úshin jazanyń bultartpaýshylyǵyn qamtamasyz etý, memleket pen onyń azamattarynyń neǵurlym jaıly ómir súrýine negiz bolatyn quqyqtyq rejımdi qalyptastyrý bolyp tabylady. Dál osy ustanymdar boıynsha biz ótken jylǵy jumystyń nátıjelerin baǵalaýǵa tıispiz»,- dedi Q.Mámı.
Sóz sońynda Joǵarǵy sot tóraǵasy Almaty oblystyq sottaryna sot tóreligin júzege asyrý boıynsha birqatar naqty mindetter júktedi.
Keńeske qatysýshylardyń suraqtaryna jaýap bere kele, Joǵarǵy sot tóraǵasy 11 qańtarda bılik tarmaqtary arasyndaǵy ókilettikterdi qaıta bólý boıynsha Elbasy qurǵan jumys tobynyń alǵashqy qadamdaryna aıryqsha toqtalyp ótti. «Jumys tobynyń múshesi retinde oblys aktıvi men sýdıalarǵa búginge deıin uıymdastyrýshylyq otyrystyń ótkendigin, Memleket basshysynyń nusqaýyna sáıkes jekelegen máselelerdi sheshý boıynsha tujyrymdamalyq kózqarastyń qalyptasqandyǵyn aıtyp óteıin», - dedi Q.Mámı.
Jalpy alǵanda, eldegi jaǵdaıǵa Parlament pen Úkimettiń jaýapkershiligin kúsheıte otyryp, qoldanystaǵy saıası-quqyqtyq júıeniń negizgi baǵyttaryn saqtap qalý týraly jalpy túsinik qalyptasyp otyr. Josparlanǵan sharalar quqyqtyq memleketti kúsheıtýge, tejemelik ári tepe-teńdik júıesin nyǵaıtýǵa baǵyttalatyn bolady.
Q.Mámı Qazaqstan úshin qýatty prezıdenttik bılik ınstıtýtynyń mańyzdylyǵyna aıryqsha toqtala kele: «Táýelsizdik jyldary el damýynyń strategııalyq máselelerin sheshýde memlekettik bıliktiń birligin qamtamasyz etetin prezıdenttik basqarý nysany ózin-ózi tolyǵymen aqtady», - dedi.
«Memlekettik organdardyń alǵashqy usynystary osy aptanyń sońyna deıin Prezıdent Ákimshiligine usynylatyn bolady. Joǵarǵy sot kúni keshe ǵana aldaǵy reforma boıynsha óz usynystaryn engizdi», - dedi Q.Mámı. Bular - sot qurylymy men sot isin júrgizý boıynsha Úkimetpen, Parlamentpen, quqyq qorǵaý jáne basqa da memlekettik organdarmen ózara is-qımyl boıynsha máseleler. Ult Josparyn iske asyrý aıasyndaǵy zańnamany odan ári jetildirýmen baılanysty sharalar, sondaı-aq Ekonomıkalyq yntymaqtastyq jáne damý uıymynyń ozyq tájirıbesi de usynyldy.
Bılik ókilettikterin qaıta bólý boıynsha usynystardy ázirleý barysynda otandyq jáne sheteldik tájirıbe, Konstıtýtsııa men zańdardy qoldaný praktıkasy zerdelenetin bolady. Jumys tobynyń qyzmetine zańgerlik, ǵylymı-saraptamalyq qaýymdastyq pen jalpy jurtshylyq ókilderi tartylatyn bolady. Usynylatyn sharalardy keńinen talqylaý, ókilettikterdi qaıta bólýdi zańnamalyq qamtamasyz etý boıynsha aýqymdy jumystar atqarylatyn bolady.