Almaty metrosyndaǵy «Dostyq», «Saryarqa» beketteriniń qurylysy jalǵasady

ALMATY. QazAqparat - Almaty metrosyndaǵy «Dostyq»,«Saryarqa» beketteriniń qurylysy odan ári jalǵasady. Bul týraly Almaty qalasynyń máslıhaty bekitken 2018 jylǵy bıýdjetinde aıtylǵan, dep habarlaıdy QazAqparat tilshisi.

Almatyda VI shaqyrylymdaǵy qalalyq máslıhattyń XXV-shi sessııasy barysynda qalanyń 2018 jylǵy bıýdjeti bekitildi. Keler jylǵy bıýdjette Almaty metrosynyń «Dostyq»,«Saryarqa» beketteriniń qurylysyn odan ári jalǵastyrý qarastyrylǵan.

«Jańa beketter iske qosylǵanda jolaýshy legi 1,5 esege artyp, jylyna 18 mln jolaýshy tasymaldanady. Keler jyly ınvestordy  anyqtaý boıynsha konkýrs ótedi, sonymen qatar JRK (jeńil relsti kólik - red) jobasynyń aıasynda jumystar qolǵa alynady», delingen habarlamada.

Sondaı-aq keler jyly qoǵamdyq kólik pen kólik ınfraqurylymyn damytý baǵdarlamasy da jalǵasyn tappaq.

«Bul eki baǵytqa basymdyq beriledi. Bıýdjettegi barlyq shyǵynnyń besten bir bóligi jumsalady. Bıylǵy jyly qalanyń avtobýs parki  30%-ǵa jańardy, 180 shaqyrymnan astam jol jóndeldi. Keler jyly joǵary sapaly qyzmet kórsetetin jańa avtobýstarǵa sýbsıdııa bólinedi. 600 myńnan astam turǵyndy jeńildetilgen keste boıynsha tasymaldaý jalǵasady. Bulardan ózge, qalada syıymdylyǵy joǵary avtobýstarda jolaýshylardy ekspress-tasymaldaý qaıta  jańǵyrady. Bıylǵy jyly BRT-nyń alǵashqy kezeginiń 2,7 shaqyrym jelisi jasaldy, 2018 jyly jobanyń ekinshi kezeńiniń jobalyq smetalyq qujattamasy jasalady», delingen habarlamada.

Máslıhat depýtattary bekitken jobada qalanyń tarıhı ortalyǵyn qaıta jasaý jumystary júrgizile beretindigi kórsetilgen.

«Tóle bı kóshesi - Dostyq dańǵyly - Abaı dańǵyly - Esentaı ózeniniń jaǵalaýy engen, ıaǵnı tarıhı ortalyqtyń 178 gektar jeri qaıta jóndeýden ótedi. Keler jyly 17 jaıaý júrginshi aımaǵy abattandyrylady, halyqaralyq standart boıynsha jasalyp jatqan Respýblıka alańyn qaıta qurý jumystary aıaqtalady. Qaladaǵy saıabaqtardy, skverlerdi jáne jasyl aımaqty damytý úshin 2018 jyldyń bıýdjetinen ótken jylmen salystyrǵanda 6,3 ese kóp qarjy jumsalady», - delingen habarlamada.

Almatyda 2018 jyly 500 aýlany jóndeý qarastyrylǵan. Osylaısha, abattandyrylǵan aýlalar sany 33%-ǵa jetedi.

 Aıta keterligi, Almatyda sońǵy eki jyl ishinde 732 aýla alańdary jóndeldi.