Almaty meshitterinde ekpe salý pýnkti ashyldy

ALMATY. QazAqparat - Almaty meshitterinde ekpe salý pýnkti ashyldy. Bul №8 qalalyq emhanasynyń bas dárigeri, Almaty qalasy Qoǵamdyq densaýlyq saqtaý basqarmasynyń Almaly aýdandyq medıtsınalyq birlestiginiń úılestirýshisi Farıda Aǵybaeva onlaın brıfıng barysynda málim etti, dep habarlaıdy QazAqparat tilshisi.

Onyń aıtýynsha, qazir qalada ekpe salatyn 211 pýnkt jumys istep jatyr. Sondaı-aq 40 kóshpeli mobıldi brıgada bar.

«Onyń ishinde, egý pýnkterinde dinı uıymdar da bar. «Qalqaman» aýmaǵyndaǵy jáne «Nur» meshitine kelýshilerge vaktsınatsııa pýnktteri ashylyp, jumys istep jatyr. 30 sáýirge deıin «Mýzammıl», «Ál-Mádına», «Abdýlla», «Almaty ortalyq meshiti» meshitteriniń aýmaǵynda taǵy da birneshe pýnktter ashý josparlanýda. «Almaty ortalyq meshitiniń» vaktsınatsııalaý pýnkti jyljymaly jáne ujymdyq qyzmet kezinde jumys isteıdi. Sondaı-aq, «Voznesensk Kafedraldy shirkeýi» men «Hram Hrısta Spasıtelıa» shirkeýinde ashyldy, olar jeksenbi kúni de jumys isteıdi»,-dedi Farıda Aǵybaeva.

Egý pýnktterinde medıtsına qyzmetkerlerine medıtsınalyq joǵary oqý oryndary men kolledjderdiń eriktileri kómektesedi. Qazirgi kezde 364 ınternder men rezıdentter jumys isteýde. Barlyǵy 975 adam oqydy.

2021 jylǵy 28 sáýirdegi jaǵdaı boıynsha qalada 8 468 adam vaktsına saldyrdy. Onyń ishinde 316 adam otandyq ekpeni aldy.

«Infektsııany juqtyrmaǵandar kezek kúttirmeı egilgenderi jón, sonymen birge koronavırýspen aýyryp, jazylǵandar da qalmaı vaktsınalanǵandary jón. Eldegi epıdemıologııalyq jaǵdaıdy tolyq baqylaýǵa alý vaktsınatsııalaý arqyly halyqty ımmýndaý deńgeıi joǵary bolǵan jaǵdaıda ǵana múmkin bolatyndyǵyn este ustaǵan jón. Halyq jappaı vaktsınatsııalanbaıynsha, pandemııany jeńý múmkin emes», - dep esepteıdi Farıda Aǵybaeva.