Almaty men Sıan arasynda jańa júk tasymaldaýshy ushaq qatynaıdy

BEIJІŃ. QazAqparat – «Sıan-Almaty» baǵytyndaǵy jańa júk tasymaldaýshy reıstiń iske qosylýy ekijaqty saýdanyń áleýetin barynsha paıdalanýǵa yqpal etedi, al Almaty qalasy bolsa, Ortalyq Azııadaǵy tranzıttik hab retinde óńirdiń kólik-logıstıkalyq múmkindigin arttyra túsedi, dep habarlaıdy QazAqarat tilshisi «Chjýngovan» Qytaı aqparattyq ınternet-ortalyǵyna silteme jasap.

Sıan (Soltústik-batys Qytaıdyń Shensı provıtsııasynyń ákimshilik ortalyǵy) men Almaty arasynda jańa júk tasymaldaýshy ushaǵy qatynaıtyn bolady. Atalǵan avıareıs maýsym aıynan bastap qalalardyń arasynda aptasyna bir ret qatynaıtyn bolady.

Budan ári «Sıan-Almaty» baǵytyndaǵy reısterdiń jıiligi naryqtyń suranysyna baılanysty qalyptasady.

Osyǵan deıin habarlanǵanyndaı, mamyr aıynyń sońynda Qytaıdyń iri portty qalasy Tıantszın men Almatynyń arasynda júk tasymaldaýshy reısi iske qosylǵan edi.

Jergilikti buqaralyq aqparat quraldarynyń habarlaýynsha, jańa reıs 100 mln-nan astam turǵyny bar «Pekın-Tıantszın-Hebeı» ekonomıkalyq óńiri men Ortalyq Azııa arasyndaǵy júk tasymaldaý arnalaryn jetildire túspek.

Sonymen qatar Sıan qalasynan Germanııanyń Mangeım qalasyna Qazaqstan arqyly qatynaıtyn, uzyndyǵy 11,3 km bolatyn jańa baǵyt iske qosyldy. Bul baǵyt Kaspıı teńizi men Qara teńizdi basyp ótedi.