Almaty men Qonaev arasynda arnaıy ekonomıkalyq aımaqty Sıngapýr kompanııasy jobalap jatyr
«Bul joba Almaty oblysynda G4 City dep atalatyn arnaıy ekonomıkalyq salýdy kózdeıdi. Biletin shyǵarsyzdar, Almaty qalasy men Qonaev qalasynyń arasyndaǵy aralyq qazir G4 City dep atalady. Bul aýmaq tórt aýdannan turady. Ár aýdannyń ózine tán salasy bar. Sıngapýrdyń «Surbana Jurong» atty memlekettik kompanıııasy arnaıy ekonomıkalyq jobanyń josparyn ázirleıdi. Bul kompanııa 2019 jyldan beri Qazaqstanǵa jobanyń sheberlik josparyn ázirleýge tyńǵylyqty túrde kómektesip keldi. Sheberlik jospary byltyr jyl sońynda Prezıdenttiń Jarlyǵymen bekitilgen. Endi osy arnaıy ekonomıkalyq aımaqty egjeı-tegjeıli josparlaýǵa kóshtik. Qazirdiń ózinde arnaıy aımaqtyń aýmaǵy boıynsha óńirde alǵashqy oryndardyń birindemiz dep úmittenýge bolady. Óıtkeni bizdiń jobaǵa bólinip otyrǵan 30 myń gektar aýmaq «Surbana Jurong» kompanııasy Qytaıda salǵan aımaqtardan áldeqaıda úlken. Sondaǵy eń tanymal ındýstrııalyq aımaqtardyń biriniń aýmaǵy 7 myń gektar. Biraq biz sanmen birge sapaǵa da kóńil bólemiz», - dedi Almaty oblysy ákiminiń orynbasary.
Onyń aıtýynsha, arnaıy ekonomıkalyq aımaq Almaty oblysy men Almaty qalasynyń 2047 jylǵa deıingi ósimin eskere otyryp jsoparlanǵan.
«Máselen, 2048 jylǵa deıin AEA sheńberinde shamamen 3,7 trln teńge ınvestıtsııa tartý, 17 trln teńgeden astam taýarlar men qyzmetter óndirý jáne 60 myńǵa jýyq jumys ornyn qurý josparlanýda. Tutastaı alǵanda, jańa ekonomıkalyq aımaqtyń áreketi G4 City-de týrıstik, medıtsınalyq, kólik-logıstıkalyq, bilim berý jáne mádenı-demalys ınfraqurylymynyń jedel damýyna ákeledi dep kútilýde. AEA rejımi sonymen qatar obektilerdi salýǵa arnalǵan kúrdeli shyǵyndardy azaıtýǵa múmkindik beredi», - dedi Rýstam Isataev.