Almaty mektepterinde býllıngtiń aldyn alý úshin QR-kodtar ornatyldy

ALMATY. QazAqparat - Almaty prokýratýrasynyń bastamasymen kámelet jasyna tolmaǵandar arasynda quqyq buzýshylyqtyń aldyn alý maqsatynda pılottyq rejımde «Senim buryshy» atty ınternet-resýrs iske qosyldy. Onyń QR-kody orta bilim beretin otyz mektepke qoıyldy, dep habarlaıdy QazAqparat tilshisi.

Prokýratýranyń málimetinshe, oqýshylar men ata-analarǵa yńǵaıly bolýy úshin ár synyp bólmesinde balalardyń quqyǵy buzylǵan kezde smartfon kamerasyn QR-kodqa baǵyttaý arqyly mektep ákimshiligine anonımdi onlaın-ótinish jasaýǵa jaǵdaı jasalǵan.

«Protsesti tsıfrlandyrý nátıjesinde kámelet jasyna tolmaǵandarǵa qatysty 561 quqyq buzýshylyq boıynsha shara qabyldanyp, olarǵa jedel den qoıýǵa múmkindik berdi. Mysaly, oqýshylar arasyndaǵy býllıngtiń aldyn alý jónindegi keńestiń otyrystarynda qaraldy, nátıjesinde 175 oqýshy mektepshilik esepke, 98 oqýshy táýekel tobynyń esebine qoıyldy jáne bir fakti kámeletke tolmaǵandar quqyǵyn qorǵaý jónindegi komıssııanyń otyrysynda qaraldy», - dep habarlady prokýratýra.

Pılottyq joba Alataý aýdanynyń oqýshylary men ata-analary arasynda oń baǵalandy. Atalǵan jumys qalanyń basqa mektepterinde de júrip jatyr.

Eske salaıyq, elimizde balalardy býllıngten qorǵaıtyn ereje bekitilgen edi.

Sondaı-aq buǵan deıin Astana mektepterinde de býllıngti boldyrmaý maqsatynda QR-kodtar ornatylǵan bolatyn.