Almaty mektepteri janyndaǵy jol belgileri jańartyldy
«Birinshiden, «Balalardyń jol qaýipsizdigi» baǵdarlamasy boıynsha jalpy bilim beretin mekemelerge irgeles jatqan jol ýchaskeleriniń jabdyqtalýyna baılanysty zertteý júrgizildi. Búgingi kúni qala boıynsha 207 jalpy bilim beretin jáne mektepke deıingi mekemelerde «Jaıaý júrginshiler ótkeli» jol belgileri syzyldy, 139 jol belgisi qalpyna keltirildi jáne 313 jol belgisi ornatyldy», – dedi Almaty qalasy PD Ákimshilik polıtsııa basqarmasynyń bastyǵy Nurlan Amanbek.
Spıkerdiń sózinshe, bul aldyn alý is-sharasy jol-kólik jaraqattarynyń aldyn alýǵa jáne balalardyń qatysýymen bolatyn apatty tómendetýge baǵyttalǵan.
«Patrýldik polıtsııa qyzmetkerleri avtokólik júrgizýshilerimen balalardy avtokólikte tasymaldaý kezinde qaýipsizdik belbeýin jáne qaýipsizdikti saqtaý quraldaryn mindetti túrde qoldaný qajettiligi, sondaı-aq orta mektepter men mektepke deıingi mekemelerdiń aımaǵynda 40 km/saǵ jyldamdyqty saqtaý týraly túsindirý jumystaryn júrgizdi», – dedi ol.
Aıta keteıik, jańa oqý jylynyń oflaın rejımde bastalýyna baılanysty, shaharda jalpyrespýblıkalyq «Nazar aýdaryńyz, balalar!» jedel aldyn alý sharasy ótken bolatyn.