Almaty mektepteri kelesi jyly avtobýstarmen qamtamasyz etiledi

ALMATY. QazAqparat - Almaty ákimi Erbolat Dosaev kelesi jyly «Mektep avtobýstary» baǵdarlamasy júzege asyrylatynyn aıtty, dep habarlaıdy QazAqparat tilshisi.

Medeý aýdany turǵynynyń saýalyna jaýap bergen ákim qaladaǵy mektepter ornalasqan barlyq kóshelerde kólik keptelisi bar ekenin aıtty.

«Kelesi jyly biz Almatyǵa, barlyq mektepterge mektep avtobýsy baǵdarlamasyn iske qosýdy josparlap otyrmyz. Jekemenshik mektepter bizge qosylsa, men de qýana qabyldaımyn. Bul qalada aıtarlyqtaı kólik keptelisin azaıtady dep oılaımyn», – deıdi Erbolat Dosaev.

Megapolıs basshysy qyrkúıektiń 1-i men mamyrdyń 25-i aralyǵynda qaladaǵy barlyq kóshede kólik kóp bolatynyn tilge tıek etti.

«Mundaı tájirbıe bar. Múmkin biz kezeń kezeńimen bastaımyz. Baǵdarlamany kelesi jyly júzege asyramyz», - dep tolyqtyrdy ákim.