Almaty medıtsına ýnıversıteti oqý jylynyń uzartylýyna qatysty túsinik berdi

ALMATY. QazAqparat – Asfendııarov atyndaǵy Qazaq ulttyq medıtsına ýnıversıteti «Jalpy medıtsına» mamandyǵynyń 5-kýrs stýdentteri alty jyldyń ornyna jeti jyl oqıtyny týraly BAQ-ta taraǵan aqparatqa pikir bildirdi, dep habarlaıdy QazAqparat tilshisi.

Medıtsınalyq JOO baspasóz qyzmeti 2019 jyly QazUMÝ-ǵa «Jalpy medıtsına» bilim berý baǵdarlamasyna túsken stýdentter 7 jyl oqıtynyn, onyń 5 jyly bakalavrıat, 2 jyly ınternatýra ekenin habarlady.

«Oqýǵa túser kezde ár stýdent joǵary bilim baǵdarlamasy boıynsha bilim berý qyzmetin kórsetetin ekijaqty kelisimdi toltyryp, qol qoıdy. Osy qujattaǵy oqý merzimine qatysty 1.3 tarmaǵynda «Bilim alý normatıvti merzimi MJMBS mamandyǵymen anyqtalady» delingen.

2019 jyly oqýǵa túsken stýdentterdiń bilim alýy 2018 jylǵy MJMBS-men retteledi. Oǵan sáıkes, «Jalpy medıtsına» baǵdarlamasy boıynsha oqytý – 7 jyl (5+2). Bakalavrıat dárejesin bitirgen túlekter medıtsına bakalavry dıplomyn alady, al ınternatýrany bitirgen soń AMSK dárejesinde jumys isteı alatyn dáriger dıplomyn ıelenedi», - dep túsindirdi QazUMÝ.

Joǵaryda aıtylǵan MJMBS-nyń 2020 jyldan beri kúshi joıylǵan. Sol sebepti ýnıversıtetke 2020 jáne 2021 jyly túsken tulǵalar 2020 jylǵy MJMBS boıynsha bilim alady. Oqý merzimi – 6 jyl (5+1).

Ýnıversıtetke 2022 jáne 2023 jyly túsken azamattar MBBÚI aıasynda 2022 jylǵy MJMBS boıynsha oqıdy. Oqý merzimi – 6 jyl.