Almaty máslıhatynyń depýtattary polıtsııa departamentinde boldy

ALMATY. QazAqparat - Almaty qalasy máslıhatynyń jergilikti memlekettik basqarý jáne qaýipsizdik jónindegi turaqty komıssııasy polıtsııa departamentinde bolyp, kólik turaǵynda qalyptasqan jaǵdaımen tanysty, dep habarlaıdy QazAqparat tilshisi.

Búlik pen lańkestik áreket saldarynan 165 qyzmettik kólik jaramsyz bolǵan. Onyń 53-i órtenip ketken, 64-in qalpyna keltirý múmkin emes.

«Bizdiń komıssııa músheleri jáne máslıhat depýtattary beıbit turǵyndardy qorǵaý maqsatynda jankeshtilik tanytyp, qaza bolǵan erjúrek batyrlardyń jaqyndaryna qaıǵyra kóńil aıtady. Ár adamnyń ómiri mańyzdy, sondyqtan beıbit jáne táýelsiz Qazaqstandy saqtaý bárimiz úshin óte mańyzdy. Quqyq buzýshylardan kelgen shyǵyndy baǵamdap, polıtseılerdiń jumysyn talqylaý úshin Almaty qalalyq polıtsııa departamentine de bardyq. Sońǵy oqıǵalardy eskere otyryp, qala basshylyǵy men polıtsııa qyzmetkerleri tonaý, qaraqshylyq shabýyl, buzaqylyq jáne lańkestik áreketter sııaqty quqyq buzýshylyqtardyń aldyn alýǵa kóbirek kóńil bóletin bolady»,- deıdi qalalyq máslıhattyń jergilikti memlekettik basqarý jáne qaýipsizdik jónindegi turaqty komıssııasynyń músheleri.

Eske salaıyq, 6 qańtarǵa qaraǵan túni lańkester Almaty qalalyq polıtsııa departamentiniń ǵımaratyna 27 ret shabýyl jasady.

Úsh ákimshilik ǵımarat tórt jaqtan kóptegen shabýylǵa ushyrady.

Lańkester basyp kirý úshin atys qarýyn, granata, Molotov kokteılderin, tastar men aýyr tehnıkany paıdalandy. Qazirgi ýaqytta kelgen shyǵyn eseptelip jatyr.

Buryn habarlanǵandaı, bes front-ofıs, sondaı-aq Almaly aýdandyq polıtsııa basqarmasy men polıtsııa departamentiniń ǵımarattary zaqymdanǵan.

19 modýldik jáne 13 ekologııalyq polıtsııa posty zaqymdandy jáne órtendi.