Almaty máslıhatynyń depýtattary koronavırýsqa qarsy vaktsınalandy

ALMATY. QazAqparat - Almaty qalasy máslıhatynyń depýtattary koronavırýsqa qarsy ekpe saldyrdy, dep habarlaıdy QazAqparat tilshisi.

Vaktsına Almaty qalasyndaǵy №5 emhanada salyndy. Almatynyń máslıhat depýtattary aldymen dárigerlerdiń tekserýinen ótip, qan taldamasyn tapsyrdy. Ekpe alǵannan keıin 30 mınýt boıy dáriger baqylaýynda boldy.

«Pandemııa kezinde koronavırýs juqtyryp alý qaýpi vaktsına saldyrý qaýpimen salystyrǵanda áldeqaıda joǵary ekenin túsinemin. Biz adamdar arasynda jıi júremiz, sondyqtan vaktsına óte mańyzdy. DDU paıymdaýynsha, jappaı vaktsınalaýdyń arqasynda ǵana pandemııany toqtatyp, adamdardyń ómirin saqtap qalýǵa bolady», - dedi máslıhat depýtaty Stanıslav Kankýrov.

Aıta keteıik, 2021 jyldyń 1 aqpanynda elimizde halyqty jappaı vaktsınalaýǵa arnalǵan aýqymdy shara bastaldy.

«Dáriger bolǵandyqtan, koronavırýstyń taralýyna jappaı vaktsınatsııa ǵana qarsy tura alatynyn bilemin. Immýndaý aýrý qaýpin birneshe esege azaıtatynyn túsinýimiz kerek. Búgin áriptesterimizben birge halyqtyń qaýipsizdigi biz úshin asa mańyzdy ekenin kórsetkimiz keledi. Bul vırýsty osylaı ǵana jeńe alamyz», - dedi máslıhat depýtaty Ásııa Aqanova.

Aıta keteıik, Qazaqstanda koronavırýstan vaktsınalaý tegin jáne erikti túrde júrip jatyr.