Almaty Marafonynyń jarqyn sátteri (FOTO, VIDEO)

ALMATY. QazAqparat- Búgin Ońtústik astanada mereıtoılyq V Almaty Marafony máresine jetti. Bıylǵy qaıyrymdylyq sporttyq sharasyna resmı túrde 13 000-nan astam adam qatysty. Biraq, shyn mánisinde odan áldeqaıda kóp boldy. Almaty qalalyq Dene shynyqtyrý jáne sport basqarmasynyń bastyǵy Naıl Nurovtyń aıtýynsha, búgin máre syzyǵyn 30 myńdaı adam júgirip ótti.

«Elimiz bıyl óziniń táýelsizdiginiń 25 jyldyǵyn atap ótip jatyr. Al, Almaty Marafony osy 25 jyl ishinde júzege asyrylǵan eń tabysty sporttyq jobaǵa aınaldy. Buǵan deıin birde bir sporttyq sharaǵa munshalyqty kóp adam jınalǵan emes. Búgin Almaty Marafonyna 14 000-daı adam tirkeldi. Biraq, máre syzyǵyn 30 000-daı adam júgirip ótti. ıAǵnı, tirkelmeı-aq júgirgender óte kóp boldy. Aldaǵy jyly Almaty Marafonyna budan da kóp adam qatysady degen úmittemin. Barlyqtaryńyzdy belsendi bolyp, salamatty ómir saltyn ustanýǵa shaqyramyn», - dedi N. Nurov.

Shynynda da buqaralyq sıpatqa ıe bolǵan búgingi Almaty Marafonyna belgili tulǵalar da qatysty. Olardyń arasynda Almaty qalasynyń ákimi Baýyrjan Baıbek, «Qazaqstan halyq banki» AQ basqarma tóraıymy Úmit Shaıahmetova, «Qazaqstan damý banki» AQ basqarma tóraǵasy Bolat Jámishov, ataqty alpınıst Maqsut Jumaev, belgili jıhankez Maǵjan Saǵymbaev, aktrısa Arýjan Jazylbekova, tsırk artısi Murat Mutyrǵanov jáne basqa da belgili tulǵalar boldy. Tipti «Juldyzdy soǵystar» fılminiń basty keıipkerleriniń biri - Dart Veıderdiń, bambýktik aıý - Pandanyń maskasyn kıip júgirgender de jurtshylyqtyń nazaryna ilikti.