Almaty mańyndaǵy ushaq apatynan ІІM Qurmetti ardageri Rústem Qaıdarov qaza tapty

NUR-SULTAN. QazAqparat – Almaty mańynda apatqa ushyraǵan ushaq jolaýshylarynyń ishinde ІІM-niń Qurmetti ardageri Rústem Qaıdarov ta bolǵan, dep habarlaıdy QazAqparat QR ІІM baspasóz qyzmetine silteme jasap.

Іshki ister mınıstri jáne ІІM-niń jeke quramy Rústem Esimhanulynyń týǵan- týystaryna, jaqyn-jýyqtaryna qaıǵyryp kóńil aıtty.

Rústem Qaıdarov - ádilet general-maıory, óz eńbek jolyn qarapaıym tergeýshiden bastap, Іshki ister mınıstriniń birinshi orynbasaryna deıin kóterildi.

Rústem Esimhanuly qazaqstandyq polıtsııanyń qalyptasýy men damýyna, qylmyspen kúreske jáne qoǵamdyq tártipti saqtaýǵa ólsheýsiz úles qosty. Elimizdiń ár túpkirinde basshylyq laýazymda laıyqty qyzmet atqaryp júrgen quqyq qorǵaý júıesiniń kóptegen qyzmetkerin tárbıelep shyǵardy.

«Ol qurmetti eńbek demalysynda júrse de qoǵamdyq ómirge belsene aralasty, qazaqstandyq polıtsııanyń jańa býynyn patrıottyq rýhta tárbıeleý, urpaqtar sabaqtastyǵyn jalǵaý isine úles qosty.

ІІM-niń Qurmetti ardageri Rústem Esimhanuly Qaıdarovtyń qaıǵyly qazasy búkil elimizdiń quqyq qorǵaý júıesine orny tolmas aýyr qaıǵy ekeni sózsiz», -delingen habarlamada.

Aıta keteıik, búgin tańerteń Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshy men 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi.

Elbasy Nursultan Nazarbaev jolaýshylar ushaǵynyń apatqa ushyraýyna baılanysty kóńil aıtty.

QR DSM ushaq apatynan zardap shekkenderge medıtsınalyq kómek kórsetý úshin resýrstar jetkilikti ekenin, qan tapsyrýdyń qajeti joq ekenin málimdedi.