Almaty mańyndaǵy respýblıkalyq joldarda jańa proektsııalyq ótkelder paıda boldy

ALMATY. QazAqparat - Almaty mańyndaǵy respýblıkalyq mańyzy bar tasjoldarda jaıaý júrginshilerge arnalǵan bes jańa proektsııalyq ótkel ornatyldy, dep habarlaıdy QazAqparat tilshisi.

Jańa proektsııalyq ótkelder eldi meken, oqý oryndary jáne medıtsınalyq kómek kórsetý pýnktileriniń janynan ornatyldy.

A-2 «Ózbekstan shekarasy (Tashkent) - Shymkent - Taraz - Almaty - Qorǵas» tasjolynyń 29 shaqyrymynda (Qarasaı aýdany, Barys avtobazary janynda);

A-4 «Almaty - Shamalǵan - Uzynaǵash-Aqqaınar-Suranshy batyr-QR shekarasy» tasjolynyń 52 shaqyrymynda (Jambyl aýdany, Qarǵaly kentiniń janynda);

M-36 «Reseı shekarasy (Ekaterınbýrg) - Almaty» avtojolynyń 40 shaqyrymynda (Qarasaı aýdany, Qoshmambet kentiniń janynda);

A-2 «Ózbekstan shekarasy (Tashkent) - Shymkent - Taraz - Almaty - Qorǵas» tasjolynyń 24 shaqyrymynda (Talǵar aýdany, Panfılov kentiniń mańynda);

R-17 «Almaty-Talǵar-Báıdibek bı» tasjolynyń 15 shaqyrymynda (Talǵar aýdany, Belbulaq kentiniń janynda) ornatyldy.

«Arnaıy gobo-proektorlardyń kómegimen aýa raıynyń kez kelgen túrinde avtokólik júrgizýshileri men jaıaý júrginshiler joldaǵy aq-sary jaıaý júrginshiler jolaqtaryn kóre alady. Proektsııa júrgizýshilerge joldan ótip bara jatqan adamdardy 100-150 metr qashyqtyqtan baıqaýǵa múmkindik beredi», - deıdi «QazAvtoJol» UK resmı ókili Lázzat Stamǵazıeva.

Aıta keteıik, buǵan deıin osyǵan uqsas 30-ǵa jýyq proektsııalyq ótkel elimizdiń toǵyz óńirindegi respýblıkalyq mańyzy bar tasjoldardyń boıynda da ornatylǵan.