Almaty mańynda qazaqtyń Qara maıoryna eskertkish qoıyldy
«Búgin - biz úshin erekshe kún. Qazaqtyń birtýar uly, eliniń shynaıy patrıoty, Aýǵan soǵysynyń ataqty batyry, polkovnık Borıs Tókenuly Kerimbaevqa eskertkish ornattyq. Eskertkish ornyn kózi tirisinde ózi tańdap ketken bolatyn. Bul kentte onyń bala kúni ótti, ásker qataryna da osy jerden attandy. 35 jyl otanǵa qyzmet etti. Bizdi tabystyrǵan Aýǵan maıdany onyń ómirindegi eń bir qıyn kezeńder bolǵan edi», - dedi Borıs Kerimbaevtyń maıdandas dosy Asylhan Óteev.
Almaty qalasy qorǵanys isteri jónindegi departamentiniń habarlaýynsha, Qara maıor esimimen baılanysty qundy muralar Armııa úıiniń áskerı-tarıhı mýzeıine berilipti. Atalmysh kórme «General Panfılov» jeke menshik qory «Áskerı barlaý ardagerleriniń qory» men Almaty qalasy ákmidiginiń janyndaǵy «Aýǵanstan jáne jergilikti áskerı shaıqastardyń ardagerleri men múgedekteriniń úılestirý keńesiniń» qoldaýymen uıymdastyrylǵan.
Kópshilik aldynda sóz sóılegen Borıs Kerimbaevtyń jubaıy Raısa Kerimbaeva ekeýiniń tatý-tátti ómir súrgen jyldaryn eske aldy. Ol jastarǵa ómirdiń ár sáti qymbat ekenin aıtty. Al Asylhan Óteev polkovnık dosynyń maıdandas sarbazdar úshin basyn báıgege tikken kezderi bolǵanyn eske aldy.
«Osynyń bárin kóre tura ony «Ákeı» dep atamaýymyz múmkin emes edi. Ol Aýǵan maıdanynda biz úshin áke ornyna áke, ana ornyna ana boldy. Árqaısymyz úshin alańdap, bárimizdi de oq pen ottyń ortasynan aman alyp shyqty. Osy erligi úshin ol bizdiń júregimizde máńgi qalady», - dedi ol.
Áıgili Qara maıor Borıs Kerimbaev bıyl 12 aqpanda ómirden ozǵan bolatyn.