Almaty, Mańǵystaý oblysy muǵalimderinen anonım shaǵymdar jıi túsedi – mınıstrlik

ASTANA. QazAqparat – QR Oqý-aǵartý mınıstrligi bilim salasynda sapany qamtamasyz etý komıtetiniń tóraǵasy Ernur Daýenov qaı óńirdiń pedagogterinen aryz jıi túsetinin aıtty, dep habarlaıdy QazAqparat tilshisi.

«Túrkistan oblysynan kóp ótinish tústi. Sonymen qatar, Shyǵys Qazaqstan oblysy boıynsha ótinishter jıi kelip jatyr. Biraq bizge beıresmı ótinishter de kóp túsedi. Bul – Almaty oblysy. Al resmı statıstıkaǵa súıensek, Mańǵystaý men Almaty oblystarynda kórsetkish sonshalyqty joǵary emes»,- dedi komıtet basshysy vedomstvonyń apparat keńesinde.

Sondaı-aq, ol mundaı anonımdiliktiń sebebin de túsindirdi.

«Shyn máninde ol jerden beıresmı ótinishter kelip túsedi. Bul sol jerdegi pedagogterdiń bizdiń aýmaqtyq departamentke senimi tómen jáne olardyń jumysyna baılanysty dep bilemiz. Ekinshiden, aqparattyq túsindirý jumysynyń nashar deńgeıde júrgiziletinin aıtýǵa bolady. Bul jumysty endi qolǵa alamyz», - dedi Ernur Daýenov.