Almaty Qytaımen «aqyldy» qalalar» tájirıbesi boıynsha yntymaqtaspaq

ALMATY. QazAqparat- Almaty ákimi Baqytjan Saǵyntaev Qytaıdyń Shenchjen qalasynyń meri Veıchjýn Tsınmen beınekonferentsııa baılanysy boıynsha yntymaqtastyq pen tájirıbe almasý máselelerin talqylady, dep habarlaıdy QazAqparat tilshisi.

Onlaın kezdesý barysynda Almaty ákimi Baqytjan Saǵyntaev pen Shenchjen qalasynyń meri Veıchjýn Tsın eki qala arasyndaǵy ózara túsinistik týraly memorandýmǵa qol qoıdy.

Ortaq múddeler salasynda – «aqyldy» qalalar, AT-tehnologııalar, energetıka, ınfraqurylym, mádenıet jáne óner, ekonomıka jáne saýda, bilim, týrızm bar. Taraptar tájirıbe almasý jáne ózara tıimdi yntymaqtastyq týraly kelisti.
Zamanaýı Shenchjen – Qytaıdyń ınnovatsııalyq astanasy, onda Nobel syılyǵynyń laýreattary, Tıýrıng syılyǵy jáne Fılds medaliniń ıeleri basqaratyn kóptegen zerthanalar quryldy.
Munda Huawei, Tencent, ZTE jáne basqa da kóptegen tanymal kompanııalar ornalasqan irgeli zertteý ınstıtýttary men ınnovatsııalyq ortalyqtar jumys isteıdi.
Shenchjen qalasy ǵylymı-tehnıkalyq ınnovatsııalar ortalyǵy, óńirlik qarjy jáne saýda-logıstıkalyq ortalyq retinde qalyptasty.