«Almaty - Qostanaı» poıyzynyń mashınısi ereje buzbaǵan
Aqmola oblysynyń Esil stansasynda juma kúni tehnıkalyq sebepterge baılanysty №43 «Almaty - Qostanaı» jolaýshy poıyzy birneshe saǵat turyp qalǵan. Poıyz quramy «Túrksib Astana» JShS-yna tıesili.
«Lokomotıvke ornatylǵan qaýipsizdik jáne mashınıst jumysyn baqylaý prıborynyń tirkeý kassetalarynyń faıldaryn tekserip shyqtyq. Tekseris mashınıst tejegishti basqarýdy durys júzege asyrǵanyn kórsetti. Qaıta tekserý kezinde vagondardaǵy tejegish tetikterine muz qatyp qalǵany anyqtaldy. Buǵan jeke quram jumysshylarynyń óz mindetine atústi qaraýy sebep bolýy múmkin», - delingen habarlamada.
Nusqaýlyqqa sáıkes, Esil stansasynda lokomotıv brıgadalarynyń aýysym beketi bar. Osynda mashınıst lokomotıvti kelesi brıgadaǵa berýi, al ekinshi brıgada poıyzdy ary qaraý júrgizip ketýi tıis bolǵan.
Qostanaı jol bólimshesi bastyǵynyń orynbasary Azamat Sharseıitovtiń sózine qaraǵanda, vagondardy jylytý úshin kómir jetkizilip, sanıtarlyq-gıgıenalyq jaǵdaılar jasalǵan.
Osy jaǵdaı boıynsha Qostanaı jol bólimshesiniń jumysshylary qyzmettik tekseris júrgizip jatyr.