Almaty kóshelerimen janýarlar sherýi júrip ótti
Búgin Qazaq memlekettik tsırkiniń ujymy qala qonaqtary men turǵyndaryn 22 shildede ótetin «Er Tóstik» lazerlik shoýyna shaqyrtý retinde kavalkada ótkizdi.
Túıeler kerýeni, úıretilgen aıý, ponı, ekvılıbrıster, akrobattar, «Nomad» akrobat ujymy, jonglerler, tsırk baleti Abaı kóshesindegi tsırk ǵımaratynan Respýblıka alańyna deıin baryp qaıtty. Ónerpazdardyń óneri kóshedegilerdi tań qaldyrdy. Jolaýshylar tsırk ártisteriniń sherýin sýretke vıdeoǵa túsirip jatty.
Aıta ketý kerek, búgingi kavalkadaǵa barlyǵy 70 jýyq ártis qatysty.
«Búginde elimizde eleýli oqıǵa EKSPO halyqaralyq kórmesi ótip jatyr. Soǵan baılanysty Qazaq memlekettik tsırki qazaq ertegisi jelisinde Er Tóstik qoıylymyn, jańa lazerlik shoýyn tartý etip jatyrmyz. Barlyǵy búgingi kavalkada men Er Tóstik ertegisin sahnalaýǵa 200 ártis jumyldyrylyp jatyr. Bul - Qazaq memlekettik tsırkiniń qazaq ertegisi jelisimen qoıyp jatqan tuńǵysh qoıylymy», - dedi Qazaq memlekettik tsırkiniń dırektory Baqyt Bókebaev.
Tsırk ujymy 26 shildede jáne 2 tamyzda taǵy da dál osyndaı sherý ótkizýdi josparlap otyr.