Almaty kompanııalaryna stýdenttik jataqhana qurylysyna ınvestıtsııa salý usynyldy

ALMATY. QazAqparat - Almatylyq kásipkerlerge aldaǵy 8 jylǵa memlekettik tapsyrys ornyna stýdentter jataqhanasyn salý usynylady. Bul týraly QR BǴM «Qarjy ortalyǵy» AQ Іlgeriletý jáne syrtqy kommýnıkatsııalar departamentiniń dırektory Alpamys Satybaldın Óńirlik kommýnıkatsııalar qyzmetiniń baspasóz májilisinde aıtty, dep habarlaıdy QazAqparat tilshisi.

Spıkerdiń sózinshe, mehanızmge sáıkes JOO, kolledj nemese jeke kásipker stýdenttik jataqhana úshin ǵımarat salyp nemese qaıta qura alady jáne obekt paıdalanýǵa berilgennen keıin ótemaqy ala alady.

2022 jyly elimiz boıynsha 11 057 oryndy 32 jataqhanany paıdalanýǵa berý josparlanyp otyr.

Alpamys Satybaldın kez kelgen áleýmettik nysannyń qurylysy tabysty, turaqty ǵana emes, sondaı-aq perspektıvaly bıznes-joba ekenin atap ótti.

«Memlekettik tapsyrysty ornalastyrýdyń basty sharty stýdenttiń turý faktisi bolyp tabylady. ıAǵnı jan basyna qarjylandyrý qaǵıdaty jumys isteıdi. Memlekettik tapsyrys memlekettik mekemelerdi qospaǵanda, barlyq uıymdarda ornalastyrylady. Bir stýdentke memlekettik tapsyrystyń jyl saıynǵy mólsheri: qurylys kezinde 122 AEK (Almaty qalasynda – 144 AEK), qaıta jańartý kezinde - 47 AEK (Nur-Sultan jáne Almaty qalalary úshin 92 AEK) quraıdy. Bul rette alǵashqy 12 aıda memlekettik tapsyrys ekige teń túzetý koeffıtsıentin eskere otyryp tólenedi. Mysaly, is júzinde 100 adam turady, tólemder 200 adamǵa tólenedi, biraq jataqhananyń jobalyq qýatynan aspaıdy. Osy maqsatta respýblıkalyq bıýdjette 152 mlrd teńge qarastyrylǵan»,- dedi ol.

Memleketten tóleý merzimi ótkennen keıin obekt qurylys salýshynyń menshiginde qalady.

«Obektiniń nysanaly maqsatyn ózgertýge aýyrtpalyqty 20 jyl merzimge tirkeý jalǵyz shart bolady. Bul jobaǵa qatysý – bul bıznes úshin ınvestıtsııalar turǵysynan tıimdi usynys qana emes, sonymen qatar otandyq bilim berý deńgeıin jaqsartýǵa óz úlesin qosý múmkindigi», - dep atap ótti spıker.

Alpamys Satybaldın ataǵan taǵy bir artyqshylyq-memlekettik tapsyrysty ornalastyrýmen qatar menshik ıesiniń qosymsha tabys kózderi de bolady.

Osylaısha, stýdentterdiń turý úshin aı saıynǵy tólem memlekettik tapsyrys qunyna kirmeıdi. Onyń mólsherin jataqhana ıesi retteıdi jáne belgili bir aımaqtyń turǵyn úı naryǵynyń jaǵdaıymen anyqtalady.

Sondaı-aq, kásipker turmystyq qyzmet kórsetý úshin kommertsııalyq alańdar jasaı alady, olardyń negizgi tutynýshylary turǵyndar bolady (ashana, shashtaraz, trenajer zaly jáne taǵy basqalar).

Búginde aralyq nátıje bar – 30 630 oryndy 124 jataqhana paıdalanýǵa berildi.