Almaty kedeninde dári-dármek kontrabandasynyń partııasy tárkilendi

ALMATY. QazAqparat - Almaty qalasy boıynsha Memlekettik kirister departamentiniń «Jetisý» keden beketi men Ekonomıkalyq tergeý departamentiniń qyzmetkerleri birlesip Avıatsııalyq kólik prokýratýrasy bastamasymen Úndistannan ákelingen kontrabandany tárkiledi, dep habarlaıdy QazAqparat.

Málim bolǵandaı, kúdiktiler taza salmaǵy 356 kg bolatyn 54 449 dana «taǵamǵa bıologııalyq belsendi qospa» degen atpen daıyn dárilik zattardyń partııasyn (tabletka túrinde) Qazaqstanǵa kirgizýge tyrysqan.

Kedendik saraptama nátıjesinde taýar «dárilik zat» bolyp tabylatyny jáne terapevtik maqsattarda paıdalanýǵa arnalǵany anyqtaldy. Ol dozalanǵan dárilik formada bólshek saýdaǵa arnalyp oralǵan.

Júrgizilgen esepteýlerge sáıkes taýarlardyń kedendik quny 43,4 mıllıon teńgeni, al bıýdjetke keltirilgen shyǵyn somasy 5,2 mıllıon teńgeni qurady.

Syrtqy ekonomıkalyq qyzmetke qatysýshynyń is-áreketinde Qazaqstan Respýblıkasynyń Qylmystyq kodeksiniń 234-babynda kózdelgen «ekonomıkalyq kontrabanda» buzýshylyq belgileri baıqalady, osyǵan baılanysty materıal sheshim qabyldaý úshin Almaty qalasy boıynsha Ekonomıkalyq tergeý departamentine joldandy.

2023 jyldyń basynan bastap Departament kedendik tekserý nátıjeleri boıynsha keden zańnamasyn buzýdyń 780 faktisin anyqtady, aıyppul somasy 6,4 mıllıon teńgeni qurady, qosymsha 82,2 mıllıon teńgege kedendik tólemder men salyqtar eseptelip, óndirildi.

Memlekettik kirister departamenti «Qazaqstan Respýblıkasyndaǵy kedendik retteý týraly» Qazaqstan Respýblıkasy Kodeksiniń 34-babynyń 1-tarmaǵyna sáıkes Eýrazııalyq ekonomıkalyq odaqtyń kedendik aýmaǵyna ákelinetin taýarlar odaqtyń kedendik shekarasynan ótken kezden bastap kedendik baqylaýda ekenin eske salady.