Almaty qalasynyń ekologııa salasy boıynsha jemqorlyq áreketter áshkerelendi

ASTANA. QazAqparat – Sybaılas jemqorlyqqa qarsy qyzmet áleýmettik mańyzy bar salalarda jemqorlyqty anyqtaý boıynsha turaqty negizde jumys júrgizýde, dep habarlady búgin QR sybaılas jemqorlyqqa qarsy is-qımyl agenttiginiń baspasóz qyzmeti.

Baspasóz qyzmetiniń málimetterine qaraǵanda, Almaty qalasynyń turǵyndaryn alańdatatyn máselelerdiń biri-ekologııa. Almatynyń Sybaılas jemqorlyqqa qarsy qyzmet departamenti osy saladaǵy laýazymdy tulǵalardyń jemqorlyq áreketin toqtatty.

Naqtyraq aıtqanda, júıeli túrde para alyp kelgen Almaty qalasy Ekologııa jáne qorshaǵan orta basqarmasy basshysynyń orynbasarynyń áreketi áshkerelendi.

Olardyń bıznes ókilderinen ekologııalyq beketterde avtokólik quraldaryna ekologııalyq monıtorıng júrgizý boıynsha buryn jasalǵan memlekettik satyp alý týraly sharttar boıynsha oryndalǵan jumystardyń aktilerine qol qoıý úshin 12 mln teńgeden astam qarajat alynǵany anyqtaldy.

Budan basqa, jemqorlyq jasaýda ákimdiktiń vedomstvolyq baǵynysty uıymy – «Medeý» memlekettik óńirlik tabıǵı parkiniń» basshylyǵy áshkerelendi.

Júrgizilgen jedel-izdestirý is-sharalar park basshysynyń sanıtarlyq butaý jáne aǵashtardy kesý jónindegi sharttar aıasynda oryndalǵan jumystar aktilerine qol qoıǵany úshin kásipkerden 1,5 mln. teńge somasynda para alǵany týraly dálelder alyndy.