Almaty qalasynda Májilis depýtattary Uly Otan soǵysynyń ardagerleri men bir top tyl eńbekkerlerin quttyqtady
Parlament Májilisi men «Nur Otan» partııasynyń osy Palatadaǵy fraktsııasy uıymdastyrǵan bul shara Almaty qalasynda, burynǵy Joǵarǵy Keńestiń ǵımaratynda ótti, dep habarlaıdy QazAqparat.
Dınar Nóketaeva Májilistiń Tóraǵasy, «Nur Otan» HDP fraktsııasynyń jetekshisi Oral Muhamedjanovtyń quttyqtaý lebizin jetkizdi. Ardaqty ardagerlerdiń júrip ótken joldary, maıdan dalasynda jasaǵan qaısarlyq pen erlikteri óskeleń urpaqqa úlgi ekenin aıtty. «Qazaqstan Prezıdenti Nursultan Nazarbaevtyń tapsyrmasyna sáıkes Úkimet, Parlament depýtattary ardagerlerdiń jaǵdaıyn jaqsartý úshin barlyq múmkindikti jasap otyr. Qaharmandarymyzdyń erlikterin qurmetteý, ardagerlerdiń qamyn oılaý, jastardy patrıottyq rýhta tárbıeleý - bizdiń mindetimiz»,- dedi depýtat D.Nóketaeva.
Májilis depýtaty Turarbek Asanov bıylǵy Elbasy Joldaýyna sáıkes soǵys ardagerlerine jáne tylda eńbek etken adamdarǵa memleket tarapynan úlken qoldaý jasalyp otyrǵanyn, el bıýdjetine tolyqtyrýlar engizilgenin aıta kelip, osy oraıda Almaty qalasy da aǵa urpaq ókilderine qamqorlyq jasaýdy dástúrge aınaldyryp kele jatqanyn jetkizdi.
Kelesi kezekte sóz alǵan Májilis depýtaty Gúlmıra Isimbaeva «Soǵys ardagerleri Uly Jeńisti jaqyndatqandar! Búgingi beıbit ómirdi syılaǵan jandar. Biz soǵys jaýyngerleriniń balalarymyz. Meniń ákem panfılovshy bolǵan. Sondyqtan bul - Uly Jeńis. Biz aǵa urpaq salǵan beıbit jolmen kele jatyrmyz. Ekinshi dúnıejúzilik soǵys - álemdegi sońǵy soǵys bolsyn!»- deı kelip, ardagerlerdi quttyqtaý saltanaty elimizdiń tarıhı ǵımaratynda ótip otyrǵanyn málimdedi.
Aıta ketý kerek, Almaty qalalyq ardagerler keńesiniń Parlamenttegi bastaýysh uıymynyń muryndyq bolýymen Uly Jeńistiń 65 jyldyǵyna oraı kitapsha shyǵarylǵan. Onda ardagerlerdiń maıdandaǵy erlikteri men soǵystan keıingi eńbek joldary baıandalǵan.
Almaty qalalyq ardagerler keńesiniń tóraǵasy Erenǵaıyp Shaıhýddınov zeınetkerlerge jasalyp jatqan qoldaý týraly pikirin bildirdi. Soǵys jáne eńbek ardagerleri Іzgilik Dabaev, Evgenıı Safronov, Raıhan Jalmýrzına, Sara Bazarqulova jáne basqalar sóz sóılep, osy sharany uıymdastyrǵandarǵa rızashylyqtaryn bildirdi.
Ardagerler qurmetine Temirbek Júrgenov atyndaǵy Qazaq ulttyq óner akademııasynyń stýdentteri shaǵyn kontsert berdi. Qadirli meımandarǵa gúl shoqtary men parlamenttik syılyqtar tabys etildi.