Almaty qalasynda 30 zırat jabylady

ALMATY. QazAqparat - Almaty ákimi Erbolat Dosaev Alataý aýdanynyń turǵyndarymen kezdesýinde aqpan aıynyń sońyna deıin qalada 30 zıratty jabý josparlanyp otyrǵanyn aıtty, dep habarlaıdy QazAqparat tilshisi.

Alataý aýdany turǵyndarynyń biri ákimnen «Rahat» yqshamaýdanynda ornalasqan musylman jáne hrıstıan zırattarynyń qashan jabylatynyn surady.

Erbolat Dosaev zırattardy jabý jumystary ótken jyldyń kúzinde bastalǵanyn aıtty.

«Men sizge nemen betpe-bet kelgenimizdi aıtqym keledi. Kóptegen qorymdar tipti esepke alynbaǵan. Biz qazir olardy qabyldap, tolýyna qatysty tehnıkalyq baǵa berýimiz kerek, sodan keıin jabý týraly sheshimdi daıyndaımyz», - dedi ákim. Onyń aıtýynsha, 2011 jyldan keıin qalada birde-bir zırat jabylmaǵan.

«Qalanyń balansynda joq nárseni jaba almaımyn. Zıratty qala menshigine alý úshin onyń ólshemderin bilý kerek, ol jerde qansha oryn bolýy kerek, búginde qanshasy toly. Osy jumystardyń barlyǵyn jasap jatyrmyz. Ókinishke oraı, bul qaǵazbastylyqsyz zıratty jabý múmkin emes. Eki qaýly jobasy daıyndalyp jatyr, aqpan aıynyń sońyna deıin jabylady dep senemin», - dedi ákim.

Almaty ákiminiń orynbasary Asqar Ámrınniń sózinshe, qalada barlyǵy 70 zırat bar, onyń 30-yn jabý josparda.