Almaty qalasy jylytý maýsymyna 95 paıyz daıyn

Almatynyń jylý energetıkalyq kesheni men ınjenerlik jelileri qys mezgiline búginde 95% daıyn. Barlyq jumystar keste boıynsha júrýde. Bul týraly qala ákimdiginen málimdedi, dep habarlaıdy QazAqparat tilshisi.

Josparǵa sáıkes, Almatydaǵy qala sharýashylyǵynyń aldaǵy kúzgi-qysqy kezeńge tolyq daıyndyǵy osy jyldyń 1 qazanyna deıin qamtamasyz etiledi.
Osy jyldyń jylýaralyq kezeńinde Almatyda 17,7 km jylýmen jabdyqtaý, 120 km elektrmen jabdyqtaý, 43 km sýmen jabdyqtaý, 29 km gazben jabdyqtaý jelileri qaıta jańartylyp, jóndelýde.
Daıyndyq jumystary «Almaty elektr stantsııalary» AQ obektilerinde de júrgizilýde (JEO-1, JEO-2, Kaskad GES, Batys jylý kesheni): jylytý maýsymynyń úzdiksiz ótýi úshin energetıkalyq generatsııalaıtyn jabdyqqa (56 birlik) jóndeý júrgizilýde.

«Qaladaǵy jylý energetıkalyq keshenniń jylytý kezeńine daıyndyǵy aıaqtalyp qaldy. Bul rette jylý jelileriniń daıyndyǵy 91%-dy, sýmen jabdyqtaý – 100%-dy, elektr jelileriniń daıyndyǵy — 99%-dy quraıdy», - deıdi Almaty qalasy energetıka jáne sýmen jabdyqtaý basqarmasynyń basshysy Talǵat Malybaev.

Qysqy maýsymǵa daıyndyq máselesi Almaty ákiminiń jeke baqylaýynda. Buǵan deıin Erbolat Dosaev energetıka jáne sýmen jabdyqtaý basqarmasyna ońtústik aýdandyq qazandyqqa erekshe nazar aýdara otyryp, jylýmen jabdyqtaý obektilerindegi daıyndyq jumystarynyń barysyn baqylaýdy tapsyrǵan bolatyn.
Energetıka jáne sýmen jabdyqtaý basqarmasynyń derekterine sáıkes, atalǵan obektide aýmaqty abattandyrý, gaz qubyrlaryn, tútin murjalaryn oqshaýlaý, mazýtty saqtaý rezervýarlaryna qorshaý jumystary júrip jatyr. Qazir nysan 93% ázir. Rekonstrýktsııa aıaqtalǵannan keıin qazandyq 200 myńnan astam tutynýshyny jylýmen qamtamasyz etedi, onyń ishinde Bostandyq aýdanyndaǵy salynyp jatqan turǵyn úı keshenderi bar.
Almatynyń turǵyn úı qorynyń daıyndyǵy bekitilgen kestege sáıkes, búgingi tańda 96%-y, bilim berý nysandarynyń 98%-y, densaýlyq saqtaý nysandarynyń 98%-y daıyn.«Jylytý maýsymyna tolyq daıyndyqty qamtamasyz etý – qala úshin mańyzdy mindetterdiń biri. Qalǵan jumystardy 1 qazanǵa deıin aıaqtaý kerek. Gagarın kóshesi ashyldy. Qala turǵyndarynyń júrip-turýyna yńǵaıly bolý úshin Qajymuqan kóshesindegi qurylys – montaj jumystaryn tez arada bitirgen jón», - dedi Erbolat Dosaev jáne energetıka, bilim, densaýlyq saqtaý basqarmalaryna, sondaı-aq aýdan ákimdikterine osy máselelerdi jiti baqylaýdy tapsyrdy.