Almaty qalasy onlaın sanaqtan ótkender sany boıynsha alǵa shyqty

NUR-SULTAN. QazAqparat - 8 qyrkúıek saǵat 9:00-degi jaǵdaı boıynsha 662850 respondent onlaın sanaqtan ótti. Bir táýlik ishinde 209 myńnan asa adam sanaq saýaldaryna jaýap bergen, dep habarlaıdy Ulttyq statıstıka bıýrosynyń baspasóz qyzmeti.

Osylaısha táýliktik rekord jańaryp otyr. 570251 adam sanaq.gov.kz saıtynda, 71387 Egov portalynda tirkelý arqyly jaýap berse, 21212 adam sanaqqa Aitu qosymshasy arqyly qatysty.

Alǵashqy jeti kúnniń qorytyndysymen Almaty alǵa shyqty. Munda 88595 turǵyn sanaqtan ótkeni jaıly habarlama alǵan. Onlaın sanaqtan ótken taǵy 87275 adam Nur-Sultanda tirkelgen. Úzdik úshtikti Almaty oblysy túıindedi. Munda 62392 adam sanaq saýaldaryna jaýap berdi.

Bul kórsetkish boıynsha ázirge sońǵy eki oryndy Túrkistan jáne Atyraý oblystary enshilep tur. Bul óńirlerde sáıkesinshe 10345 jáne 6667 adam sanaqtan ótipti.

Áleýmettik jelilerde «Siz qansha tiri bala týdyńyz?» degen saýal tóńireginde pikirtalas órbýde. Atap óterligi, atalǵan suraq Eýropalyq statıstıkter konferentsııasynyń usynysymen qosylǵan bolatyn.

Áıelderdiń tiri týǵan balalary jónindegi saýal sońǵy 50 jyl ishinde Halyq sanaǵyn ótkizý kezende keńinen qoldanylyp kelgen. Bul suraq demografııalyq zertteý úshin de udaıy qoıylady.

2021 jyly tiri týǵan balalar jónindegi saýaldar dúnıege kelgen sábılerdiń jynysy men sanaq ótkizgenge deıingi sońǵy týǵan náresteniń týǵan kúnin anyqtaýǵa arnalǵan naqtylaýshy suraqtarmen tolyqty. Olarǵa berilgen jaýap keıin náreste ólimi kórsetkishin balanyń jynysyna qaraı tereń taldaýǵa qoldanylady.

Tiri týǵan balalar týraly saýal salý týý kórsetkishi týraly mańyzdy derekterdi alýǵa jol ashady. Kóp jaǵdaıda mundaı málimetti basqa jerden, tipti azamattyq hal-ahýal jaǵdaıyn tirkeý júıesi damyǵan bolsa da alý múmkin bolmaıdy. Atap óterligi, bul suraqqa tek qana reprodýktıvti jastaǵy áıelder ǵana jaýap bermeıdi. Alynǵan málimetter ár kezeńdegi týý jáne náresteler men balalar ólimi tendentsııasyn salystyrý jáne baǵalaý úshin qajet.

Halyq sanaǵy nátıjesinde jınalǵan aqparat ádette halyqtyń tabıǵı qozǵalysyn tirkeý bazasyndaǵy málimetterden áldeqaıda naqty ári tolyqqandy bolady.

Sondaı-aq, alynǵan nátıjeler BAQ tarapynan mol suranysqa ıe ekenin atap ótkimiz keledi. Sebebi, náresteler men balalar óliminiń kórsetkishi, onyń kezeń-kezeńmen ózgerýi týraly málimetterge turǵyndar úlken qyzyǵýshylyq tanytady.

Ulttyq statıstıka bıýrosy azamattardyń belsendiligi úshin alǵys aıta otyryp, sanaqty onlaın ótýge shaqyrady. sanaq.gov.kz saıty 15 qazanǵa deıin táýlik boıy qoljetimdi bolmaq. Onlaın sanaqtan ótpegender 1-30 qazan aralyǵynda ıntervıýerlerdiń saýaldaryna jaýap bere alady. Barlyq saýaldar boıynsha 1446 baılanys ortalyǵyna habarlasýǵa bolady. Qońyraý shalý tegin.