Almaty HQO-laryndaǵy daıyn qujattardy qaıdan alýǵa bolady

ALMATY. QazAqparat - QR Prezıdenti Qasym-Jomart Toqaevtyń tapsyrmasy boıynsha Qazaqstanda koronavırýs ınfektsııasy taralmas úshin barlyq halyqqa qyzmet kórsetý ortalyqtarynyń jumysy toqtady. Halyq qyzmetterdi tek elektrondy formatta alady, dep habarlaıdy QazAqparat «Azamattarǵa arnalǵan úkimet» memlekettik korporatsııasy Almaty fılıalyna silteme jasap.

30 naýryzdan bastap Almaty qalasynda daıyn qujattardy berý úshin Jandosov kóshesi, 51. mekenjaıyndaǵy Áýezov aýdandyq halyqqa qyzmet kórsetý ortalyǵy biryńǵaı tereze retinde jumys isteıdi. Munda almatylyqtar onlaın túrde kórsetiletin memlekettik qyzmetterdiń daıyn nátıjesin ala alady. eGov portalynda qyzmet nátıjesi qaǵaz túrinde beriletin 23 túrli memlekettik qyzmet bar.

«Sonymen qatar, Almaty qalasyndaǵy alty Mamandandyrylǵan HQO-lardaǵy daıyn qujattardy berý úshin, Maılın kóshesi, 85. mekenjaıyndaǵy №2 Mamandandyrylǵyn HQO terezesi jumys isteıdi. Onda avtokóligin qaıta tirkeýge qoıǵan nemese júrgizýshi kýáligin onlaın aýystyrǵandar daıyn qujattary men memlekettik tirkeý nómirin ala alady. Qyzmet alýshylardyń daıyn qujattaryn berý jumysyna «Azamattarǵa arnalǵan úkimet» memlekettik korporatsııasy Almaty qalasy fılıalynyń 20-ǵa jýyq qyzmetkeri tartylǵan. Olardyń barlyǵy qorǵanys jáne dezınfektsııa quraldarymen jabdyqtalǵan» delingen habarlamada.

Daıyn qujattardy berý terezeleriniń jumys kestesi: dúısenbi-juma 9.00-den 17.00-ge deıin. Senbi – saǵat 9.00-14.00 aralyǵy.

Aıta keteıik, 21 naýryzǵa deıin halyqqa qyzmet kórsetý ortalyqtaryna ótinish tapsyrǵan azamattar daıyn nátıjelerin 29 naýryzǵa deıin alǵash júgingen HQO-dan ala alady.

Mıgratsııalyq HQO-dan alýǵa tıis daıyn qujattardy da Áýezov aýdandyq halyqqa qyzmet kórsetý ortalyǵynan (Jandosov k-si, 51) alatynyn eske salamyz.