Almaty HQO-larynda halyq úshin «ashyq esik» kúnderi ótýde

ALMATY. QazAqparat - Almatynyń halyqqa qyzmet kórsetý ortalyqtarynda «Halyq únine qulaq asatyn memleket» qaǵıdatyn iske asyrý sheńberinde «ashyq esik» kúnderi ótýde, dep habarlaıdy QazAqparat tilshisi.

Alataý aýdandyq HQO bóliminde ótken «ashyq esik» kúnine aýdandyq prokýratýra, turǵyn úı basqarmasy men jumyspen qamtý bóliminiń mamandary qatysyp, turǵyndardy qabyldady. Jumyssyzdyq, járdemaqyny rásimdeý, turǵyn úı kezegin belgileý máseleleri boıynsha 40-qa jýyq azamattyń suraqtary qaralyp, ár memlekettik mekeme óz quzyreti sheginde azamattardyń máselelerin baqylaýǵa aldy. Keıbir turǵyndardyń máselesi sol jerde sheshildi.

«HQO-dan qyzmet alýǵa keletin azamattardyń qujattaryn qabyldaý barysynda keleńsizdikterge tap bolyp jatamyz. Qujattaryn durystap ákelýdi ótinsek, «áýre-sarsańǵa saldyń» dep klıentter renjip jatady. Mynadaı qabyldaýlar, klıentterdiń máselelerin der kezinde, áýre-sarsańsyz bitirýge septigin tıgizedi», - dedi Alataý aýdandyq bóliminiń basshysy Aıdos Aınabekov.

«Alataý aýdandyq HQO-da ótip jatqan qabyldaý azamattardyń suraýy boıynsha aıdyń sońyna deıin, dúısenbi, sársenbi jáne juma kúnderi, saǵat 10.00-den 13.00-ge deıin ótkiziledi dep josparlanýda. Shara barlyq sanıtarlyq normalardy, sonymen qatar áleýmettik qashyqtyqty saqtaı otyryp ótkizildi», - dedi Almaty HQO baspasóz qyzmetinde.

Aıta keteıik, Alataý aýdandyq HQO mekenjaıy, «Nurkent» yqshamaýdany, 5-korpýsta ornalasqan.

Buǵan deıin Almatynyń Túrksib aýdandyq halyqqa qyzmet kórsetý ortalyǵynda «ashyq esik» kúni ótken bolatyn. Onda «Qazaqstan halqyna» qoryna qatysty suraqtar HQO-nyń quziretine jatpaıtyny aıtylǵan edi.