Almaty eldiń basty iskerlik ortalyǵy mártebesin nyǵaıtýy tıis – Prezıdent

ALMATY. QazAqparat – Qazaqstan Prezıdenti Qasym-Jomart Toqaev Almatyny áleýmettik-ekonomıkalyq damytýǵa arnalǵan otyrysta shaǵyn jáne orta bıznestiń qala ekonomıkasyndaǵy ornyna toqtaldy, dep habarlaıdy QazAqparat tilshisi.

Memleket basshysy shaǵyn jáne orta bıznestiń qala ekonomıkasynda mańyzdy oryn alatynyn atap ótti. Onyń jalpy óńirlik ónimdegi úlesi - 40%, salyqtaǵy úlesi - 65%. Eńbekke qabiletti turǵyndardyń 60% astamy dál osy ShOB-tan nápaqa taýyp otyr.

«Biraq osy salada birqatar túıitkildi máseleler bar. Kásipkerlerdiń arasynda júrgizilgen saýalnamanyń nátıjesi qalanyń birneshe kórsetkish boıynsha artta qalyp otyrǵanyn kórsetedi. Atap aıtqanda, jergilikti atqarý organdary jumysynyń tıimdiligi boıynsha – 14-orynda. Qala ákimi osy jaǵdaıdy retteýi tıis», - dedi Q.Toqaev.

Prezıdent Qazaqstan halqyna arnaǵan óz Joldaýynda usaq kásipkerler men shaǵyn bıznesti úsh jylǵa salyqtan jáne tekseristerden bosatýdy tapsyrǵanyn eskertti.

«Bıznestiń osy sanatynyń osyndaı jeńildikti paıdalanýyna kómektesý qajet. Bul - «Atameken» ulttyq kásipkerler palatasynyń mindeti. Óz kezeginde, bıznes ózin damytyp, jańa jumys oryndaryn ashýy tıis. Qala ákimdigi de shaǵyn jáne orta bızneske jan-jaqty kómektese beredi, olardyń aldyndaǵy kedergilerdi joıady. Almaty elimizdiń basty iskerlik ortalyǵy mártebesin nyǵaıtýy tıis», - dedi Qasym-Jomart Toqaev.

Avtory: Danııar Dáýitálıev