Almaty eldegi sanıtarlyq normalarǵa salynǵan aıyppul boıynsha kósh bastap tur

ALMATY. QazAqparat – Almaty sanıtarlyq normalarǵa salynatyn ákimshilik aıyppuldar boıynsha Qazaqstanda kósh bastap tur. Bul týraly onlaın brıfıng barysynda qalalyq kásipkerler palatasynyń dırektory Narıman Ábilshaıyqov aıtty, dep habarlaıdy QazAqparat tilshisi.

Onyń aıtýynsha Almaty qalasynyń bas sanıtarlyq dárigeriniń qaýlysyna qulaq aspaıtyn jekelegen kásipkerler bar.

«Bizdiń qalamyz búginde ákimshilik aıyppuldar sany boıynsha Qazaqstan qalalary arasynda birinshi orynǵa shyǵyp, antıreıtınginiń kóshbasshysyna aınaldy. Almaty qalasy taýarlar men qyzmetterdiń sapasy men qaýipsizdigin baqylaý departamentiniń málimetinshe, 5 shilde men 9 qazan aralyǵynda 3 837 nysan tekserý sharasy ótkizilip, QR Ákimshilik quqyq buzýshylyq týraly kodeksiniń 425-baby boıynsha barlyǵy ákimshilik buzýshylyqtar týraly 4 myńǵa jýyq hattama toltyryldy. Salynǵan aıppuldyń jalpy somasy 235 mln teńgeden asady», - dedi ol.

Joǵaryda atalǵan kezeń aralyqta elimizde jalpy 895 mln teńgege 16 myńǵa jýyq hattama jasalǵan. Onyń ishinde 307 mln teńgesi jeke tulǵalarǵa salynǵan aıyppul.

Búgingi tańda Almaty qalasynda 26 monıtorıng toby jumys isteıdi, olardyń quramynda polıtsııa, taýarlar men kórsetiletin qyzmetterdiń sapasy men qaýipsizdigin baqylaý departamenti, aýdandyq basqarmalar, kásipkerler palatasynyń ókilderi bar. Sondaı-aq, bul toptyń jumysyna úkimettik emes uıymdar ókilderi men eriktiler úles qosyp júr.

Monıtorıng toptarynyń maqsaty - koronavırýs ınfektsııasynyń keń taralýyna jol bermeý jáne qala turǵyndary arasynda juqtyrýdyń aldyn alý.