«Almaty-Ekaterınbýrg» tasjolynda kólik apatynan eki adam kóz jumdy

KÓKShETAÝ. QazAqparat – Aqmola oblysy aýmaǵynda «Almaty-Ekaterınbýrg» tasjolynyń 1095-shaqyrymynda jol apaty bolyp, eki adam kóz jumdy, onyń biri - 10 jasar qyz bala, dep habarlaıdy QazAqparat tilshisi.

Jol apaty týraly shildeniń 19-da túngi saǵat 00:50-de Astrahan aýdandyq PB kezekshi bólimine habarlanǵan.

Aldyn ala málimet boıynsha, Qostanaı qalasynan Qaraǵandyǵa bet alǵan «Chevrolet Lacetti» kóliginiń 31 jastaǵy júrgizýshisi (Temirtaý qalasynyń turǵyny) rýlge ıe bola almaı, kólik aýdarylǵan.

Jol apaty saldarynan Temirtaý qalasynyń turǵyndary – 33 jastaǵy er adam men 10 jasar qyz bala oqıǵa ornynda kóz jumdy.

Júrgizýshi men úsh jolaýshy túrli dene jaraqatymen Astrahan aýdandyq aýrýhanasyna jatqyzylǵan.

«Osyǵan baılanysty Qylmystyq kodekstiń 345-baby 4-bóligi boıynsha sotqa deıingi tergeý sharalary qolǵa alyndy», - dep túsindirdi QazAqparat tilshisiniń saýalynan Aqmola oblystyq PD baspasóz qyzmetinen.

Aıta ketsek, budan buryn «Nur-Sultan–Petropavl» trassasynda jol apatynan 1 adam kóz jumyp, 3 adam zardap shekken bolatyn.