Almaty dúkenderine tikeleı Túrkistan oblysynan qyryqqabat jetkiziletin boldy

ALMATY. QazAqparat - Almaty qalasy men Túrkistan oblysynyń ákimdikteri erte pisken jylyjaı qyryqqabatyn tikeleı jetkizý jóninde ózara yntymaqtastyq memorandýmyna qol qoıdy, dep habarlaıdy QazAqparat tilshisi.

Kóshpeli keńes barysynda taraptar Túrkistan oblysynyń Saryaǵash, Keles jáne Saıram aýdandaryndaǵy sharýashylyq qojalyqtardy baryp kórdi.

Qol jetken kelissóz sheńberinde 15 sáýirden bastap 15 mamyrǵa deıin Almatynyń saýda jelilerine tikeleı sharýashylyq alqaptarynan kelisin 140 teńgeden 550 tonna («Magným» saýda jelisine – 300 tonna, «Smoll» saýda jelisine – 200 tonna, «Toımart» saýda jelisine – 50 tonna) qyryqqabat jetkiziledi.

Bul rette sóredegi bólshek saýda baǵasy bir keli - shamamen 185 teńge.

Sondaı-aq, memorandýmǵa sáıkes, maýsym aıynan bastap egis alqabynda ósirilgen qyryqqabattyń shamamen 2 myń tonnasy úzdiksiz jetkiziledi.

«Qabyldanǵan sharalar qyryqqabattyń baǵasyn ustap turýǵa, áleýmettik mańyzy bar ónimge baǵanyń negizsiz ósýine jol bermeýge múmkindik beredi», - dep habarlady Almaty qalasy ákimdiginen.