Almaty departamenti órt sóndirýshiler men júrgizýshilerdi jumysqa shaqyrady
Vedomstva málimetinshe, QR Úkimetiniń qaýlysyna sáıkes osy jyldyń basynan beri Almaty qalasy TJD-niń órt sóndirý men apattyq qyzmetinde shtattyq jumys orny artty.
«Osyǵan baılanysty qatardaǵy jáne kishi basqarýshy quramdy qosqanda 288 bos oryn bar. Atap aıtqanda, órt sóndirýshiler, júrgizýshiler»,- deıdi departamenttiń órt sóndirý qyzmeti kadr basqarmasy bóliminiń bastyǵy Aqjol Ábilázimov.
Sonymen qatar ol azamattyq qorǵaý organdaryna jumysshylar qandaı tártippen iriktep altynatynyn aıtyp berdi.
«Bizdiń qyzmetke 18 ben 35 jas aralyǵyndaǵy azamattar jumysqa ornalasa alady. Olar áskerı boryshyn ótegen nemese QR-nyń zańyna saı áskerı mindetin keıinge shegergen bolýy kerek. Bilimi ortashadan tómen bolmaýy kerek. Sondaı-aq kásipkerlikpen aınalyspaıtyn jáne qylmystyq jaýapqa tartylmaǵan bolýy shart. Azamat óziniń jeke jáne iskerlik qasıetterimen dene daıyndyǵy men densaýlyq jaǵdaıy boıynsha ózine júktelgen qyzmettik mindetterdi oryndaýǵa qabiletti bolýy kerek»,- deıdi Aqjol Ábilázimov.
Órt sóndirý qyzmetiniń bolashaq sarbazdaryn alǵash oqytý Málik Ǵabdýllın atyndaǵy Azamattyq qorǵanys akademııasynyń oqý ortalyǵy bazasynda ótedi.
Órt sóndirýshiler úshin bastapqy kásibı daıyndyq - 35 kúntizbe kúni. Júrgizýshiler úshin – 14 kún, ózge qyzmetter boıynsha – 7 kún. Oqý ortalyǵyna qatysyp jatqandar úsh ýaqyt tamaqpen jáne jatyn orynmen qamtamasyz etiledi. Oǵan qosa 94 325-127418 teńge kóleminde eńbekaqy tólenedi.