Almaty dárihanalarynda kezek azaıdy

ALMATY. QazAqparat – Amatyda qala ákimi Baqytjan Saǵyntaevtyń tapsyrmasymen dári-dárimekpen qamtamasyz etý boıynsha óndirýshi zaýyttarmen, jetkizýshilermen jáne dárihanalarmen birlesip kúsheıtilgen sharalar qabyldanýda, dep habarlaıdy QazAqparat tilshisi.

«GaýharTas» dárihanalar jelisiniń dırektory Gaýhar Isabekovanyń aıtýynsha, dárihanalar aldyndaǵy kezek azaıyp, jaǵdaı turaqtalǵan.

«Sońǵy 1-2 kúnnen beri úlken kezekter joq. Áleýmettik qashyqtyq ta saqtalýda, kún jyly bolǵandyqtan, qaýipsizdik maqsatynda dárihanaǵa 1 adamnan ǵana kirgizý týraly sheshimi qabyldandy», - dep túsindirdi ol.

Sonymen qatar ol, dárilik zattar men medıtsınalyq quraldardy jetkizý máselesi ákimdikpen birlesip sheshilip jatqanyn aıtty.

«Koronavırýs pandemııasyn eskere otyryp, halyq arasynda suranysqa ıe dárilik preparattar fırmaǵa kelip jatyr. Máselen, Almaty qalasynyń ákimdigimen jasalǵan qosymsha kelisim boıynsha keshe «Paratsetamol» aldyq. Buǵan deıin 3 kún buryn jetkizilip edi», - deıdi Gaýhar Isabekova.

Soǵan qaramastan, dárihanalarda «Paratsetamoldy» bir qolǵa 2 danadan beredi. Bul bir jerde atalǵan dárimen shamamen 250 adamdy qamtamasyz etýge múmkindik beredi.