Almaty dárigerleri qosymsha tólenetin ústemeaqy úshin Prezıdentke alǵys bildirdi

ALMATY. QazAqparat –Almaty dárigerleri Prezıdent Qasym-Jomart Toqaevqa Joldaýda aıtylǵan medıtsına qyzmetkerlerin qoldaý sharalary úshin alǵys bildirdi, dep habarlaıdy QazAqparat tilshisi.

Búgin Memleket basshysy Q.Toqaev Qazaqstan halqyna jyl saıynǵy Joldaýyn arnady. Joldaýda densaýlyq saqtaý júıesin damytýǵa jáne medıtsına qyzmetkerlerin qoldaý sharalaryna erekshe kóńil bólindi.

Atap aıtqanda, Prezıdent medıtsına mamandaryna ústemeaqy tóleýge 150 mlrd teńge bólýdi tapsyrdy. Osyǵan baılanysty Almatynyń medıtsına qyzmetkerleri Q.Toqaevqa kórsetken qoldaýy úshin alǵys bildirdi.

№4 qalalyq emhanasynyń klınıkalyq farmakology Áıgerim Toqtybaeva Óńirlik kommýnıkatsııalar qyzmeti alańynda ótken onlaın suhbat barysynda aıtylǵan bastamalarǵa alǵys bildirdi.

«Qasym-Jomart Kemelulynyń búgingi Joldaýy týraly aıtqym keledi. Prezıdent elimizdiń medıtsına qyzmetkerlerine ekinshi jartyjyldyqta yntalandyrý ústemeaqylaryn berý úshin 150 mlrd teńge bólýdi tapsyrdy. Barlyq medıtsına qyzmetkerleriniń atynan Prezıdentke osyndaı úlken kómek úshin úlken alǵysymdy bildirgim keledi. Pandemııa kezinde jumys istegen árbir medıtsına mamany óz ómirin qaterge tikti, al búgingi Joldaý bizge úlken qýanysh syılady», — dep atap ótti Áıgerim Toqtybaeva.