Almaty dárigerleri 52 jastaǵy júkti áıeldi bosandyryp, egiz sábıdi aman alyp qaldy
Perınatologııa jáne balalar kardıohırýrgııasy ortalyǵyna júktiliktiń 31 aptasynda basy aınalyp, ishi aýyryp, qan qysymy joǵarylap ketken 52 jastaǵy áıel tústi.
Dárigerler júkti áıelge – aýyr preeklampsııa, jatyr tyrtyǵy dıagnozyn qoıdy. Naýqasta 2007 jyly da aýyr preeklampsııa bolǵan.
Aıta ketý kerek, áıel egizderdi EKO arqyly kótergen.
«Ýltradybystyq zertteý kezinde ekinshi uryqtta júrek aqaýy anyqtaldy. Sol sebepti áıel shuǵyl operatsııaǵa alyndy. Preeklampsııa anaǵa da, uryqqa da qaýip tóndirýi múmkin edi. Sondyqtan, kesar tiligi arqyly bosandy. Nátıjesinde salmaǵy 1,644 gramm jáne 990 gramm eki ul bala dúnıege keldi. Náresteler shala týǵandyqtan jansaqtaý bólimine aýystyrylyp, arnaıy ınkýbatorda 10 kún jatty. Otadan keıin analarynyń da jaǵdaıy aýyr boldy, ol da birneshe kún jansaqtaý bóliminde jatty. 5 kúnnen keıin jańa bosanǵan áıel bólimge aýystyryldy, sodan keıin balalaryn ákeldik. Búgingi kúni ana men balalardyń jaǵdaıy jaqsy. Patologııa bóliminde jatyr. Jańa týǵan náresteler salmaq qosyp jatyr, qaýip joq. Jaqynda olar úıine shyǵady», - deıdi dáriger Balzııa Ábilmájinova.
Óz kezeginde egizderdiń anasy dárigerlerge alǵysyn aıtty.
«Avtobýstan túsip kele jatyp qulap qaldym, úıge kelgende búkil denem isip ketti. Jaǵdaıym kúrt nasharlady, ishim aýyrdy, qan qysymym kóterilip, basym aınaldy. Jedel járdem shaqyrdym, olar meni Perınatologııa jáne balalar kardıohırýrgııasy ortalyǵyna alyp keldi. Barlyq tekserýden keıin maǵan birden ota jasaldy. Oıansam, balalarymynyń jansaqtaý bóliminde jatqanyn aıtty. Árıne, men olar úshin qatty ýaıymdadym, óıtkeni olardyń bireýi óte álsiz boldy. Biraq osy ortalyqtyń reanımatologtary, neonatologtary jáne basqa da mamandarynyń kásibıliginiń arqasynda balalarym tez saýyǵyp ketti. 10 kúnnen keıin jansaqtaý bóliminen shyqty. Qazir balalar salmaq qosyp úlgerdi, bireýi qazirdiń ózinde 2 keliden, ekinshisi 1600 grammnan asady. Reanımatologtarǵa, neonatologtarǵa jáne barlyq medıtsınalyq qyzmetkerlerge erekshe rahmet aıtamyn»,-deıdi egizderdiń anasy.