Almaty bilim basqarmasy oqýshylardy jazǵy lagerdiń ornyna saýnaǵa jibergen

ALMATY. QazAqparat - Almatylyq oqýshylardy demalsyn dep jazǵy lagerge emes, saýnaǵa jibergen. Bul týraly Almaty turǵyny Irına Kım áleýmettik jelide jazdy, dep habarlaıdy QazAqparat tilshisi.

Almaty turǵyny Irına Kım «Arman dala» lagerinde túsirilgen foto-vıdeolardy jelige saldy.

Onyń aıtýynsha, eki kún buryn Jetisý aýdanynyń oqýshylary atalǵan lagerge demalýǵa attanǵan.

«Keshki ýaqytta balalar ata-anasyna ózderiniń qalaı ornalasqany týraly foto, vıdeolar jibere bastady. Ata-analar ony kórip shoshyp ketti. Kóbi balalaryn alyp ketýge kelip, osy vıdeony túsirdi. Balalar men ata-analar qandaı sezimde bolǵanyn elestete alasyz ba? Bul úshin kim jaýap beredi?» dep jazdy jeli qoldanýshysy.

Osyǵan oraı Almaty ákimdigi túsinik berdi.

Ákimdiktiń málimetinshe, qalalyq bilim basqarmasy balalar demalysyn uıymdastyrýda jaýapsyz qyzmet kórsetken uıymdarmen sottasady.

Qyzmet kórsetýshi «BelRıchı» JShS kompanııasyna qatysty jaýapsyz jetkizýshi dep taný jáne odan ári memlekettik satyp alýǵa qatysýǵa tyıym salý týraly talap-aryz daıyndalyp jatyr.

Basqarma qyzmet kórsetýshiniń memlekettik satyp alý talaptaryna tolyq sáıkes kelgenin túsindirdi.

Máselen, 13 shildede «Arman dala» saıajaı lagerinde balalar demalysyn uıymdastyrý jóninde shart jasalǵan, 15 shildede bilim basqarmasy qyzmetkerlerimen birge demalýshylardyń alǵashqy legi keldi.

Tıisti talaptardyń buzylý faktileri anyqtalǵan kezde balalardy úıine aparý protsesi shuǵyl bastaldy. Qazirgi ýaqytta lagerde bala qalǵan joq.

Jaqyn arada mektep oqýshylary demalys erejeleri qatań saqtalatyn lagerlerge jiberiledi.

«Qyzmet kórsetýshimen aǵymdaǵy shart buzylady, sondaı-aq osy kompanııanyń basqa memlekettik satyp alýǵa qatysýyna jol bermeý úshin josyqsyz ónim berýshi dep taný jóninde talap aryz beriledi. Bilim basqarmasynyń jaýapty qyzmetkerine qatań sógis jarııalandy. Qazirgi ýaqytta bilim basqarmasy qoǵamdyq keńespen birlesip jumys tobyn qurdy, onyń quramyna ata-analar, qalalyq prokýratýranyń jáne barlyq múddeli organdardyń ókilderi kirdi. Jumys toby aıasynda qala syrtyndaǵy búkil lagerler tekseriledi. Jumys toby qala mańyndaǵy lagerlerge júrgizilgen monıtorıng nátıjesi týraly únemi esep beredi», - dep habarlady ákimdiktiń baspasóz qyzmeti.