Almaty bazarlary 2020 jylǵa deıin zamanaýı saýda ortalyǵyna aınalýy tıis - ákimdik
Qalada bolatyn sharalar tizimine oraı bazarlardy qaıta jańǵyrtý jumystary 2020 jylǵa deıin aıaqtalady.
«Biz bul jekemenshik ınvestıtsııalar ekenin túsinemiz. Bizde bekitilgen arnaıy baǵdarlama bar. Kásipkerler men ákimdiktiń arasynda kelisimshart bar. Soǵan oraı, kásipkerler barlyq nysandardy bekitilgen kestege sáıkes ýaqytynda sapaly túrde aıaqtaýǵa mindetteledi», - dedi ákimniń orynbasary.
Onyń aıtýynsha, Alataý-2, Tastaq, Atakenttegi Qarqara, Aınabulaq, Bahar jáne Úmit sııaqty 6 bazardyń jóndeý jumystary bıyl jyl sońyna deıin bitýi kerek. Taǵy 5 bazardyń túrlenýi keler jyly aıaqtalady.
«Kásipkerlerdiń arasynda qujattaryn daıyndamaǵan adamdar bolsa, bizben aqyldasa otyryp jaqyn arada eskız jobalaryn jasap ótkizýi kerek. Ol qujatty sáýlet-qurylys baqylaý basqarmasyna maquldaýǵa jiberý kerek. Sonan soń ákimdikpen talqylaý kerek. Kesh bolmaı turǵanda barlyq bazar ıeleri eki jylda usynystaryn kórsetip úlgergeni durys. Búginde 39 bazardy qaıta jańǵyrtý eskızi maquldandy. Qalada barlyǵy 57 bazar jumys istep tur. Eń bastysy - bazarlar úıilgen konteınerler formasynan yńǵaıly zamanaýı keshenge aınalýy tıis», - dedi ol.
Almas Mádıev 20 myńǵa jýyq adam eńbek etip jatqan bazarlardyń ıelerin baǵdarlamaǵa selqostyq tanytpaýǵa shaqyrdy.
«Bizde órkenıetti saýda bolýy kerek. Qalalyq memlekettik kirister departamentiniń málimetinshe, kóleńkeli aınalymda 2 mln teńge aınalady. Adamdar salyq tólemeıdi. Bir bazarlar ózgerip jatyr ma, basqalary da ózgersin. Bárine talap birdeı. Talapty oryndamaýǵa bolmaıdy. Bul jerde baqylaý qatań bolady. Biraq biz qoldaýǵa da ázirmiz», - dedi Mádıev.
Qala ákiminiń orynbasary «Jibek joly», «Bıznestiń jol kartasy» baǵdarlamalary aıasynda kásipkerlerdi qoldaýǵa kóp qarajat bólinip jatqanyn aıtty.
«Jibek joly» baǵdarlamasynyń kapıtaldandyrý kólemi 12 mlrd teńgege jetti. Baǵdarlama júzege asqannan bastap 250 sýbekt jeńildetilgen nesıe alǵan. Al «Bıznestiń jol kartasy» baǵdarlamasy boıynsha 800 nysan qarjylandyryldy.
Sonymen qatar, qala ákiminiń orynbasary bazarlarda kassalyq-chek apparattaryn engizý mindeti alǵa qoıylyp otyrǵanyn aıtty.
Aıta ketý kerek, shuǵyl jıynnyń ótýine «Mızam» bazarynyń basyndaǵy jaıt sebepker boldy.
Almaty ákimdigi munyń aldynda Mızam bazarynyń basshylyǵyna qoıylǵan talaptardy oryndamaǵany úshin 1,5 mln teńge aıyppul salǵan bolatyn.
Saýda ortalyǵynda azyq-túliktiń ornyna jıhaz jáne basqa da turmystyq zattar satylyp kelgen. Sondaı-aq, ýaǵdalasqan saýda ortalyǵynyń ornyna tez arada jyldam qarqynmen konteınerler qabaty boı kótergen.