Almaty bas josparynyń avtory 2030 jylǵa qaraı qalanyń kelbeti qandaı bolatynyn aıtty
Onyń aıtýynsha, Almaty qalasynyń jańa bas jospary bıyl jyldyń sońyna deıin qabyldanyp, bekitilmek. Joba 2,4 mln turǵynǵa eseptelip jasalǵan.
Bas jospardyń avtory qaladaǵy qazirgi ózgerister bolashaqtaǵy kelbetinen sıpattap beredi.
«Kóp jyldar boıy Almaty keńestik paradıgmamen damydy. Kóshelerdi keńitip, kólikterge jaǵdaı jasalyp keldi. Ózgeris jasaıtyn ýaqyt keldi. Qazirgi jóndeý jumystary júıeli túrde atqarylyp keledi. Jyl saıyn qaıta-qaıta jóndeý jumystarynan góri barlyǵyn 1 jylda jasap úlgergen jón. Almatynyń 2020 jylǵa deıingi damý baǵdarlamasyna sáıkes, qalamyzdy kólikter úshin emes, adamdarǵa yńǵaıly etip salatyn bolamyz», - dedi Altaı Satybaldın.
Onyń aıtýynsha, eń basty ózgeris ekologııalyq ahýaldy jaqsartýǵa baǵyttalmaq, kólikterdiń jańa túri jeńil relsti kólik, metro, BRT damymaq.
«Qalanyń shekarasy ulǵaımaıdy. Bizdiń aldymyzdaǵy basty mindet - qalanyń aınalasyndaǵy aglomeratsııany túgel damýyna jaǵdaı jasaý. Syrttaǵy aımaqtarda da yńǵaılylyq bolýy kerek. Osylaısha syrttan keletin adamdarǵa qalaǵa kelýdiń qajettiligi bolmaıdy», -dedi sáýletshi.
Sondaı-aq, qaladaǵy jasyl jelek kólemin de ulǵaıtý kózdelgen.
«Búgingi tańda bir adamǵa 4 sharshy metr jasyl jelek keledi. Bul óte az. Jańa bas jospar boıynsha bul kórsetkishti 13 sharshy metrge deıin ulǵaıtý mindettelgen», - dedi A.Satybaldın.
Sonymen qatar, qujatta Almaty Qapshaǵaı tas jolyndaǵy bos jerge jańa áýejaı salý, Almaty úlken aınalma jolynyń qurylysy máselesi de kóterilgen.
Bas jospardyń avtory Altaı Satybaldın qandaı ózgeris bolmasyn, qala ǵımarattarynyń tarıhı sıpaty saqtalatynyn aıtty.