Almaty aýyr mashına jasaý zaýyty karantın jaǵdaıynda qalaı jumys istep jatyr

ALMATY. QazAqparat – Almaty aýyr mashına jasaý zaýyty kúrdeli ekonomıkalyq ahýal jaǵdaıynda óndiris kólemin qysqartqan joq. Kásiporyn karantın kezinde qalaı jumys istep jatqanyn kásiporynnyń bas dırektory Jetpisbaı Edigenov QazAqparat tilshisine aıtyp berdi.

«Sanıtarlyq epıdemıologııalyq qyzmet pen «Atameken» UKP ókilderinen qurylǵan komıssııa júrgizgen monıtorıngke sáıkes «Almaty aýyr mashına jasaý zaýyty» barlyq sanıtarlyq normalar saqtalǵan eń úzdik kásiporyn qataryna jatqyzyldy. Biz sanıtarlyq talaptardyń barlyǵyn túgel oryndap otyrmyz. Qatań karantın, árıne, bizdiń jumysqa yqpalyn tıgizdi. Oblys jabyq turǵanda kóptegen jumysshylarymyz kele almaǵany ras. Biraq, bizde negizinen adam jetispeýshiligi burynnan bar problema. Sonda da biz barlyq mindettemeler men óndiris kólemin toqtatpaýǵa, qysqartpaýǵa tyrysyp jatyrmyz», - dedi Jetpisbaı Edigenov.

Qazir zaýytta 426 adam jumys istep jatyr.

Onyń aıtýynsha, karantın sharalaryn kúsheıtý – ýaqyt talaby.

«Birinshi kezek adamdardyń densaýlyǵy jaıly oılaý kerek. Karantındi odan da kúsheıtken durys. Talaptardy oryndamaǵan adamdy aıyppulmen, bolmasa basqasha jazalaý kerek dep sanaımyn», - dedi kásiporynnyń bas dırektory.