Almaty aýrýhanasynan AITV juqtyrǵan úsh naýqaspen baılanysta bolǵan 593 adam tekserilip jatyr

ALMATY. QazAqparat - Almatynyń ortalyq klınıkalyq qalalyq aýrýhanasynda emdelip jatyp, AITV juqtyrǵan 3 patsıenttiń isin arnaıy komıssııa tekserip jatyr, dep habarlaıdy QazAqparat.

Komıssııa jumysty 14 maýsymda bastaǵan.

Tekserý sheńberinde patsıentterdiń baǵyty belgilenedi, OKQA-da kórsetiletin medıtsınalyq qyzmetterdiń kólemi men sapasy jáne patsıentter emdelgen bólimshelerde medıtsınalyq kómek kórsetýge baılanysty ınfektsııa profılaktıkasy boıynsha ınfektsııalyq baqylaýdyń saqtalý monıtorıngi baǵalanady.

Tekserý barysynda búkil úsh patsıent sáýir aıynda OKQA-nyń birneshe bólimshesinde medıtsınalyq kómek alǵany anyqtaldy.

Qazirgi ýaqytta patsıentterdiń marshrýtyn eskere otyryp, baılanys sheńberi belgilenip jatyr.

Olarmen baılanysta bolǵan 593 adamnan AITV-ǵa tekserý úshin materıal alyndy, onyń 419-y teris, qalǵan 174-iniń nátıjesi áli shyqqan joq.

«Densaýlyq saqtaý mınıstrligi isterdi tekserý barysyn erekshe baqylaýda ustaıdy jáne bul týraly jurtshylyqty únemi habardar etip otyrady» dep habarlady vedomstvodan.

Eske sala keteıik, buǵan deıin Almaty ortalyq klınıkalyq aýrýhanasynda jatqan úsh naýqastan AITV anyqtalǵanyn habarlaǵan edik.