Almaty áýejaıynda jolaýshy sómkesindegi zarıadtaý qurylǵysy atyldy

ALMATY. QazAqparat – Almaty qalasynyń áýejaıynda jolaýshynyń rıýkzagynda bolǵan zarıadtaý qurylǵysy atyldy, dep habarlaıdy QazAqparat QR Indýstrııa jáne ınfraqurylymdyq damý mınıstrligi Azamattyq avıatsııa komıtetine silteme jasap.

«19 qazan kúni halyqaralyq reısterdiń ushý zalynda tekserý rásiminen ótý kezinde Eır Astana áýe kompanııasynyń «Almaty — Bishkek» baǵyty boıynsha KS 109 reısimen ushpaq bolǵan jolaýshy T.M.-nyń portatıvti zarıadtaǵyshy (Power bank) órtendi», - delingen málimette.

Osy oraıda «Qazaqstannyń avıatsııalyq ákimshiligi» AQ Formaldylyqty ońaılatý departamenti qajet bolǵan jaǵdaıda keńes alýǵa, rásiminen ótý kezinde avıakompanııa men áýejaılardyń qyzmetkerlerin zarıadtaý qurylǵylarynyń bar ekendigi týraly habardar etýge qatań keńes beredi.

Qaýipti júkterdi áýemen qaýipsiz tasymaldaý jónindegi IKAO-nyń DOC 9284 tehnıkalyq nusqaýlyǵyna sáıkes, qosalqy batareıalar, sonyń ishinde qýat kózderi (Power bank) qol júgimen tasymaldanýy kerek. Sondaı-aq qysqa tuıyqtalýdyń aldyn alý úshin olar óziniń qaptamasyna salynýy kerek. Nemese ár batareıany bólek plastık paketke nemese qorǵanys korpýsyna salý qajet.

«Eger lıtıı batareıalary (jabdyqta, ne jabdyqpen) júk retinde tasymaldanatyn bolsa, onda olar IKAO tehnıkalyq nusqaýlyǵynyń qoldanystaǵy redaktsııasyna sáıkes tıisti túrde deklaratsııalanýy, tańbalanýy jáne býyp-túıilýi tıis.

Esterińizge sala keteıik, ushý qaýipsizdigi ár jolaýshynyń jaýapkershiligine de baılanysty», - dedi Azamattyq avıatsııa komıtetinen.