Almaty áýejaıynda tóbeles bolyp, tártip saqshysy qyzmettik qarýdan oq atty

ALMATY. QazAqparat - Áýejaıdyń avtoturaǵynda mas úsh er adam tóbelesti. Keıin olardyń biri bótelkeni syndyryp, kelgen polıtseılerge qaraı júgirdi, dep habarlaıdy QazAqparat tilshisi.

Onyń vıdeosy áleýmettik jelide tarap jatyr.

Almaty qalalyq polıtsııa departamentiniń málimetinshe, 26 shildede túngi saǵat bir shamasynda Almaty Halyqaralyq áýejaıy aýmaǵyndaǵy týrıstik polıtsııa beketiniń quramyndaǵy polıtsııa qyzmetkerlerine er adam kelip, kólik turaǵynda tóbeles bolyp jatqanyn aıtqan.

«Aqparat rastaldy, anyqtalǵanyndaı ishimdik ishken úsh er adam tóbelesip jatty. Olar polıtsııa qyzmetkerleriniń talabyna agressııamen jaýap berdi. Tóbelesýshilerdiń biri, buryn sottalǵan 1994 jyly týǵan Ý. esimdi azamat syranyń shyny bótelkesin syndyryp, polıtseıge qaraı júgirip, ony soqqyǵa jyqpaq boldy. Aýyr qylmystyń jolyn kesken tártip saqshysy qyzmettik qarýynan aspanǵa eskertý oq atty», - dep habarlady qalalyq polıtsııadan.

Nátıjesinde tóbeleske qatysýshylar ustaldy. Olar - Almaty jáne Túrkistan oblystarynyń turǵyndary. Ekeýi - adam tonaǵany jáne bótenniń múlkin urlaǵany úshin buryn sotty bolǵan.

«Olardyń áreketi QK-niń 293-baby 2-bóligi – buzaqylyqpen saralanyp, qamaýǵa alyndy. Atalǵan derek boıynsha sotqa deıingi tergeý bastaldy»,- dep atap ótti vedomstvodan.

Sonymen qatar, qyzmettik qarýdy qoldaný deregi boıynsha qyzmettik tekserý júrgiziletin bolady.