Almaty áýejaıynda taksıdiń shekti tarıfi belgilendi

ALMATY. QazAqparat – Almaty qalasy Kásipkerler palatasynyń janyndaǵy týrızm keńesi qala áýejaıyndaǵy taksı qyzmetteriniń qunyna taldaý júrgizdi. Óńirlik kommýnıkatsııalar qyzmetiniń brıfınginde palata tóraǵasynyń mindetin atqarýshy Narıman Ibragımov josyqsyz taksı júrgizýshiler máselesi rettelgenin aıtty, dep habarlaıdy QazAqparat tilshisi.

Spıker salalyq komıtetpen tarıfter usynylyp, áýejaı aýmaǵynda taksı baǵalary kórsetilgen tıisti stendter ilingenin atap ótti.

«Týrıstik maýsym basynda, eki apta ishinde jumys toby taksıge tapsyrys berý qyzmetterin usynatyn AparuTaxi, Region, Yandex Taxi, Uber, Blue Sky Energy qunyn taldap, sapardyń ortasha baǵasy esepteldi. Jolaýshylardy tasymaldaý tarıfteri bastapqy jáne baratyn pýnktke deıin qashyqtyqqa ári taksı sanatyna baılanysty 1 200-den 12 000 teńgege deıin ózgeredi. Eń joǵary quny áýejaı termınalynan Shymbulaq taý shańǵysy kýrortyna deıingi taksıdiń premıým-segmentinde kórsetiledi», - dedi ol. Almaty qalasynyń týrızm jónindegi keńesi quramyna Almaty qalalyq kásipkerler palatasynyń, Avıatsııalyq kólik prokýratýrasynyń, Almaty qalasy týrızm basqarmasynyń, Almaty qalasy halyqaralyq áýejaıynyń, Túrksib aýdany ІІB JPQ, Almaty qalasy memlekettik kirister departamentiniń, Almaty qalasy ІІD-niń, Qazaqstandyq týrıstik qaýymdastyqtyń, Almaty qalalyq TJK óńirlik palatasynyń ókilderi endi.

Buǵan deıin Almatyda shetel azamattaryn áýejaıdan qonaq úıge deıin 800 dollarǵa jetkizgen taksı júrgizýshisi jazalanǵany týraly jazǵan bolatynbyz.

Sondaı-aq kóktemde Reseı Federatsııasynyń azamatyn áýejaıdan Markov kóshesine deıin 400 eýroǵa jetkizgen taksı júrgizýshisine de aıyppul salynǵan edi.