Almaty áýejaıynda «qyzyl» mártebesi bar 171 jolaýshy anyqtaldy

ALMATY. QazAqparat- Almaty áýejaıynda «qyzyl» mártebesi bar 171 jolaýshy anyqtaldy. Bul týraly Almaty qalasy Kásipkerler palatasy dırektorynyń quqyqtyq máseleler jónindegi orynbasary Saltanat Lesbaeva brıfıngte aıtty, dep habarlaıdy QazAqparat tilshisi.

Onyń aıtýynsha, «Ashyq» jobasy arqyly indettiń taralýynyń aldyn alýǵa bolady.

«Nur-Sultan qalasynyń áýejaıynda 252 oqıǵa, al Almaty qalasynyń áýejaıynda 171 oqıǵa tirkeldi. Onda azamattardyń mártebesi oń bolyp shyqty. Soǵan qaramastan olar ushýǵa tyrysqan. Al «Ashyq» jobasy kem degende 15 myń qazaqstandyqtyń ómirin indetten qorǵap qaldy», - dedi Saltanat Lesbaeva.

Sonymen qatar, ol oqshaýlaýǵa jatatyn kelýshiler anyqtalǵan jaǵdaıda sanıtarlyq-epıdemıologııalyq baqylaý organdary olardy ákimshilik jaýapkershilikke tartýǵa quqyly ekenin atap ótti.

«Eń abzaly, karantın sharalaryn qatań saqtap, adamdar kóp shoǵyrlanatyn oryndarǵa qajet bolmasa barmaǵan jón. Sanıtarlyq dárigerler maska qoldanyp, qashyqtyqty saqtaýdy usynyp otyr. Osy talapty azamattar esten shyǵarmasa eken»,- deıdi ol.