Almaty áýejaıynda kólik keptelisi máselesi qashan sheshiledi
«Ózderińiz biletindeı, kólik turaǵyndaǵy adamdar aǵyny – áýejaıdyń basty máseleleriniń biri. Qazirgi tańda pandýs qaıta salynyp jatyr. Sol sebepti ushyp shyǵý joldaryna aparatyn jol jabyq. Pandýstyń rekonstrýktsııasyn bıyl shilde-tamyz aılarynda aıaqtaýdy kózdep otyrmyz. Osydan soń halyqaralyq reısterge paıdalanylatyn jańa pandýsty salý josparlanǵan», - dedi Alyp Er Tunǵa Ersoı.
Spıker keptelis máselesi kelesi jyly barlyq jobalar aıaqtalǵan soń sheshimin tabatynyn jetkizdi.
«Ushaq ushatyn jerge joldy ashqan kezde, másele sheshimin tabady. Sebebi, ushý aımaqtaryna baratyn balama jol paıda bolady. Jańa VIP-termınaldyń qurylysy aıaqtalǵan soń, ońtústik VIP-tiń alańdary turaq úshin paıdalanylatyn bolady. Ekinshi pandýstyń qurylysy aıaqtalǵan soń, turaq keńeıtiledi. Jalpy, aldaǵy ýaqytta áýejaıdaǵy turaq, keptelis máselesi sheshimin tabatyn bolady dep oılaımyn», - dedi ol.
Sondaı-aq Alyp Er Tunǵa Ersoıdyń aıtýynsha, Almaty áýejaıynyń jańa termınalynyń qurylysy búgingi kúni 53% aıaqtalǵan. Termınaldy kelesi 2024 jyly jazda tapsyrý josparlanǵan.
Sondaı-aq áýe aılaǵynyń basshysy Almaty áýejaıynyń aýmaǵynda taksı tasymalymen zańsyz aınalasý problemasyna qatysty aıtty.
«Áýejaı aýmaǵynda júretin zańsyz taksıler – bizdiń kezekti problemanyń biri. Ókinishke qaraı, áýejaı aýmaǵyndaǵy jeke tasymaldaýdy retteý memlekettik organdardyń quzyretine kiredi. Biz polıtsııamen jıi habarlasyp turamyz. Máseleler týyndasa, biz únemi olarǵa habarlasamyz. Taǵy qaıtalap aıtaıyn, ol bizdiń quzyretimizge kirmeıdi. Biraq, biz qoldan keletin barlyq sharalardy jasaýdamyz. Men adamdardy tasymaldaýmen aınalysatyn jeke kompanııa bolǵany úshin, kólikter bir standartta, júrgizýshiler bir ýnıformada, jolaýshylarǵa qolaıly jaǵdaıdy qamtamasyz etý maqsatynda taksoparktardyń ókilderimen kezdestim, bárin resmı túrde rásimdeýge usyndym. Ókinishke oraı, biz áli konsensýsqa jetken joqpyz», - dedi Alyp Er Tunǵa Ersoı.