Almaty áýejaıy qalanyń Ortalyq Azııadaǵy kólik-logıstıkalyq hab retindegi rólin nyǵaıtady

ALMATY. QazAqparat – Jańa termınal iske qosylǵannan keıin áýejaı qalanyń búkil Ortalyq Azııadaǵy kólik-logıstıkalyq hab retindegi pozıtsııasyn nyǵaıtady. Bul týraly Almaty ákimi Erbolat Dosaevtyń TAV Airports Holding jańa bas dırektory Serkan Kaptanmen jáne Almaty halyqaralyq áýejaıy basshylyǵymen kezdesýinde aıtyldy, dep habarlaıdy QazAqparat tilshisi.

«Almaty úshin áýejaıdy damytýǵa baǵyttalǵan máseleler óte mańyzdy. Óıtkeni, áýejaı – qalanyń áýe qaqpasy ári áýe alańy. Rasynda da, qalamyzdyń bolashaqta damýy áýejaıdyń jaǵdaıyna, onyń ınfraqurylymyna, servıs deńgeıi men yńǵaılylyǵyna tikeleı baılanysty. Bizde Almatynyń joǵary mártebesine laıyq barlyq halyqaralyq standarttarǵa sáıkes zamanaýı termınal bolýy tıis. Óz tarapymnan qalanyń budan bylaı da jobaǵa qoldaý bildiretinin rastaımyn», - dedi Erbolat Dosaev.

Áýejaıdyń jańa termınalynyń iske qosylýy jolaýshylardy ótkizý qabiletin jylyna 7 mıllıonnan 14 mıllıonǵa deıin arttyrady jáne qalanyń búkil Ortalyq Azııadaǵy transporttyq-logıstıkalyq hab retindegi pozıtsııasyn nyǵaıtady.

Sondaı-aq, kezdesýde Almaty halyqaralyq áýejaıynyń damý perspektıvalary men sheberlik-josparlaryn jyldyń aıaǵyna deıin ázirleý jáne nysan aýmaǵyndaǵy kólik ınfraqurylymyn birlese damytý sharalary talqylandy. Megapolıs basshysy osy qujattyń jyl aıaǵyna deıin qabyldanatyn qalanyń bas josparymen sáıkes bolýy tıis ekenin atap ótti.

Foto: Almaty qalasy ákimdiginiń baspasóz qyzmeti