Almaty áýejaıy 13 qańtardan jumysyn bastaıdy

ALMATY. QazAqparat - Almaty áýejaıy 13 qańtardan bastap jumysyn qaıta bastaıdy. Bul týraly áýejaıdyń baspasóz qyzmeti málim etti, dep habarlaıdy QazAqparat tilshisi.

«Almaty halyqaralyq áýejaıy 2022 jylǵy 13 qańtar, saǵat 00:00-den bastap óz qyzmetin qaıta bastaıdy. Almaty qalasynda komendanttyq saǵattyń engizilýine baılanysty áýejaı jumysy 08:00-den 21:00-ge deıin júzege asyrylady. Іshki jáne halyqaralyq reıster oryndalatyn bolady. Qaýipsizdikti qamtamasyz etý maqsatynda termınalǵa kirýge tek jolaýshylarǵa ǵana ruqsat etilgen»,- delingen habarlamada.

Eske salsaq, Almaty halyqaralyq áýejaıy tehnıkalyq jaǵynan ashylýǵa daıyn ekenin jáne qaladaǵy jaǵdaı turaqtanǵannan keıin qaıta qyzmet kórsete bastaıtynyn jazǵanbyz.

Sondaı-aq, Almaty áýejaıynda qalpyna keltirý jumystary júrgizilip, keltirilgen shyǵyndar eseptelip jatqanyn habarlaǵan bolatynbyz.