«Almaty-Atyraý» poıyzynyń apatqa ushyraýyna aıyptylarǵa jaza kesildi
Eske sala keteıik, 19 sáýirde Atyraý oblysynyń Qyzylqoǵa aýdanynda «Almaty-Atyraý» baǵytyndaǵy jolaýshylar poıyzy joldan shyǵyp ketip, saldarynan jolaýshylardyń densaýlyqtaryna ortasha jáne jeńil dárejedegi zııan kelgen. «Tergeý barysynda vagondardyń jaramdy tehnıkalyq jaǵdaıda bolǵandyǵy anyqtaldy, olar 2013 jyly josparly jóndeýden ótken. Al 2014 jyly arnaıy kásiporyndarda tehnıkalyq tekserýden ótkizilgen. Jolaýshylar poıyzynyń apatqa ushyraýyna temirjoldyń kúrt qısaıyp ketýi sebep bolǵan. Ol osynyń aldynda atalmysh ýchaskede júrgizilgen jóndeý jumystarynyń sapasyz, nusqaýlyqtar men reglamentterdiń buzylýymen júrgizilgendigimen túsindirildi», - dep habarlady Qazaqstan Respýblıkasynyń Bas kólik prokýratýrasynan. «QTJ» UK» AQ komıssııasy, sonymen qatar Kólik jáne kommýnıkatsııa mınıstrliginiń Kóliktik baqylaý komıtetiniń mamandary da osyndaı sheshimge keldi. Atalmysh is boıynsha aıyptalýshylar retinde irilendirilgen Atyraý jol aralyǵy ýchaskesiniń bastyǵy J. (júrgizilgen jóndeý jumystaryna tikeleı basshylyq etýshi) men onyń orynbasary N. (aǵymdaǵy jóndeý jumystarynyń jaı-kúıi men júrgizilýine jaýapty) jaýapqa tartyldy. Atyraý oblysy Qyzylqoǵa aýdandyq sotynyń 26 qyrkúıektegi úkimimen atalǵan tulǵalarǵa QR QK 295-babynyń 1-tarmaǵy boıynsha QR QK 63-babyn qoldana otyryp, bir jylǵa deıin synaq merzimimen eki jylǵa bas bostandyqtarynan aıyrý túrinde shartty jaza kesildi.